لاہور کے معروف لوہاری گیٹ کے علاقے میں دکانوں کے قریب زور دار بم دھماکا ہوا ہے جس کے نتیجے میں 3 افراد جاں بحق جبکہ متعدد افراد زخمی ہو گئے۔

کمشنر لاہور نے بم دھماکے کے نتیجے میں 3 افراد کے جاں بحق ہونے کی تصدیق کی ہے۔

پولیس کے مطابق سلنڈر پھٹنے سے قریب کھڑی موٹرسائیکلیں جل گئیں۔

زوردار دھماکے کے نتیجے میں متعدد عمارتوں کے شیشے بھی ٹوٹ گئے جبکہ قریب موجود بینک کی عمارت کو شدید نقصان پہنچا ہے۔

لاہور، سلنڈر پھٹنے سے ماں اور 5سالہ بیٹاجاں بحق

پولیس کے مطابق علاقہ کماہاں کے قریب مدینہ کالونی کے گھر میں سلنڈر پھٹنےکی تحقیقات کے دوران پولیس نےاپنی مدعیت میں سلنڈر پھٹنے کا مقدمہ درج کر کے تفتیش شروع کردی ہے، سلنڈر پھٹنے سے گھر میں موجود ماں اور 5سالہ بیٹاجاں بحق ہو گئے تھے

دھماکا ہوتے ہی جائے دھماکا پر پولیس، بم ڈسپوزل اسکواڈ، ریسکیو ادارے اور فائر بریگیڈ کا عملہ فوری پہنچ گیا۔

ریسکیو اداروں اور فائر بریگیڈ نے امدادی کارروائیاں کرتے ہوئے آگ بجھائی اور جھلس جانے والے افراد کو وہاں سے اسپتال منتقل کیا۔

میؤ اسپتال کے ایم ایس کے مطابق 25 زخمیوں کو میؤ اسپتال لایا گیا ہے جن میں سے دو زخمی دورانِ علاج دم توڑ گئے جن میں ایک بچہ بھی شامل ہے جبکہ 4 افراد کی حالت تشویش ناک ہے جن کا آپریشن تھیٹر میں آپریشن جاری اور ان کی جان بچانے کی کوشش کی جا رہی ہے۔

دھماکے میں کراچی کا بچہ جاں بحق

جاں بحق ہونے والے بچے کی شناخت 9 سالہ ابصار کے نام سے ہوئی ہے جس کا تعلق کراچی سے ہے۔

دھماکے کے نتیجے میں جاں بحق ہونے والے بچے ابصار کے والدین بھی زخمی ہوئے ہیں۔

دھماکے کے 1 اور جاں بحق شخص کی شناخت 31 سالہ رمضان کے نام سے ہوئی ہے جو لاہور کا رہائشی ہے۔

1 بج کر 45 منٹ 42 سیکنڈ پر دھمکا ہوا

دھماکے مقام پر نصب کیمرے کی سی سی ٹی وی فوٹیج کے مطابق 1 بج کر 45 منٹ 42 سیکنڈ پر یہ دھمکا ہوا۔

دھماکا ٹائم ڈیوائس یا ریموٹ کنٹرول بم پھٹنے سے ہوا

پولیس کی جانب ٹائم ڈیوائس یا ریموٹ کنٹرول بم کے پھٹنے کا خدشہ ظاہر کیا جا رہا ہے جس کے حوالے سے تحقیقات جاری ہیں۔

بم ڈسپوزل اسکواڈ، فرانزک ٹیمیں اور دیگر تفتیشی ماہرین دھماکے کے حوالے سے شواہد حاصل کرنے اور نمونے جمع کرنے میں مصروف ہیں۔

ریسکیو ذرائع کے مطابق دھماکے کی جگہ پر ڈیڑھ فٹ گہرا گڑھا بھی پڑ گیا ہے۔

ڈپٹی کمشنر لاہور نے کیا کہا

ڈی سی لاہور کی جانب سے انارکلی بازار میں بم ڈسپوزل اسکواڈ تعینات کرنے کی ہدایت کی گئی ہے۔

ڈپٹی کمشنر لاہور کے مطابق دھماکا 1 بج کر 45 منٹ پر ہوا، جس کی نوعیت کا بم ڈسپوزل، پولیس اور فرانزک ٹیمیں تعین کر رہی ہیں۔

انہوں نے بتایا کہ تفتیش ہورہی ہے، واقعے کی جگہ سیف سٹی سیکیورٹی سسٹم میں کور ہے، ٹیسٹنگ سے معلوم ہوگا کہ دھماکا سلنڈر کا تھا یا دھماکا خیز مواد سے ہوا۔

لاہور دھماکا: وزیرِ اعظم عمران خان کا اظہارِ افسوس

وزیرِ اعظم عمران خان نے لاہور دھماکے میں قیمتی انسانی جانوں کے ضیاع پر اظہارِ افسوس کیا ہے۔

جاری کیے گئے بیان میں وزیرِ اعظم عمران خان نے زخمیوں کو فوری طور پر طبی امداد کی فراہمی کی ہدایت جاری کی ہے۔

وزیرِ اعظم عمران خان نے پنجاب حکومت سے واقعے کی رپورٹ بھی طلب کر لی۔

شہباز شریف اور مریم نواز کی دھماکے کی مذمت

مسلم لیگ نون کے صدر، قومی اسمبلی میں اپوزیشن لیڈر میاں شہباز شریف اور ان کی بھتیجی، نون لیگی رہنما مریم نواز نے انارکلی بازار لوہاری گیٹ میں ہونے والے دھماکے کی مذمت کی ہے۔

دونوں رہنماؤں کی جانب سے علیحدہ علیحدہ جاری کیے گئے بیان میں دھماکے کی مذمت کی گئی ہے۔

مسلم لیگ نون کے صدرمیاں شہباز شریف کا کہنا ہے کہ انار کلی دھماکے میں قیمتی جانی نقصان پر بے حد دکھ اور افسوس ہوا۔

انہوں نے کہا کہ جاں بحق افراد کے اہلِ خانہ سے تعزیت اور زخمیوں کی صحت یابی کی دعا کرتے ہیں۔

مریم نواز کی جانب سے بھی انارکلی بازار میں دھماکے کی مذمت کرتے ہوئے کہا گیا ہے کہ دھماکے میں بچے سمیت 3 افراد جاں بحق اور کئی زخمی ہو گئے، اللّٰہ تعالیٰ پاکستان پر رحم فرمائیں۔

بلاول بھٹو زرداری کی بم دھماکے کی مذمت

چیئرمین پیپلز پارٹی بلاول بھٹو زرداری نے لاہور میں ہونے والے بم دھماکے کی شدید مذمت کی ہے۔

بلاول بھٹو زرداری نے دھماکے میں جاں بحق افراد کے لواحقین سے اظہارِ افسوس کرتے ہوئے کہا ہے کہ اسلام آباد میں پولیس افسران کی شہادت کے بعد اب انارکلی میں دھماکا تشویش ناک ہے۔

انہوں نے کہا کہ ملک میں دہشت گردی قابو سے باہر ہوتی جا رہی ہے، وزیرِ اعظم عمران خان میں وہ اہلیت ہی نہیں کہ کسی بحران کو حل کر سکیں۔

چوہدری برادران کی لاہور دھماکے کی شدید مذمت

مسلم لیگ ق کے رہنما، چوہدری برادران کی جانب سے لاہور کے انارکلی بازار میں ہونے والے دھماکے کی شدید الفاظ میں مذمت کی گئی ہے۔

ایک بیان میں سربراہ مسلم لیگ ق چوہدری شجاعت حسین نے مطالبہ کیا ہے کہ امن خراب کرنے والوں کو گرفتار کر کےسزا دی جائے گی۔

پنجاب اسمبلی کے اسپیکر چوہدری پرویز الہٰی نے مطالبہ کیا ہے کہ زخمیوں کو فوری طور پر بہترین طبی امداد دی جائے۔

ق لیگ کے رہنما چوہدری مونس الہٰی کا کہنا ہے کہ اللّٰہ تعالیٰ جاں بحق افراد کی مغفرت کریں اور زخمیوں کو جلد صحت عطا فرمائیں۔