حسن علی کی فاطمہ ثنا کو مبارکباد

24 جنوری ، 2022

قومی کرکٹ ٹیم کے فاسٹ بولر حسن علی نے فاطمہ ثنا کو انٹرنیشنل کرکٹ کونسل (آئی سی سی) کی ایمرجنگ ویمن کرکٹر آف دی ایئر منتخب ہونے پر مبارک باد دی۔

سماجی رابطے کی سائٹ ٹوئٹر پر کئے گئے اپنے پیغام میں حسن علی نے فاطمہ ثنا کی حوصلہ افزائی کرتے ہوئے کہا کہ ہمیشہ آگے بڑھتی رہو۔

انہوں نے یہ بھی کہا کہ ہماری خواتین کرکٹ ٹیم آگے بڑھ رہی ہے اور پاکستان کا سر فخر سے بلند کر رہی ہے۔

خیال رہے کہ گزشتہ روز فخر پاکستان اور ملک کی بیٹی فاطمہ ثنا نے انٹرنیشنل کرکٹ کونسل (آئی سی سی) کی ایمرجنگ وویمن کرکٹر آف دی ایئر کا ایوارڈ حاصل کیا تھا۔

فاطمہ ثنا آئی سی سی ایوارڈ حاصل کرنے والی پہلی پاکستانی خاتون کرکٹر ہیں، اس ایوارڈ پر فاطمہ ثنا کا کہنا ہے کہ وہ ایوارڈ جیتنے پر خوش ہیں۔