دعا منگی کیس، مفرور ملزم کی گرفتاری کیلئے بڑے اقدامات

کراچی پولیس کی جانب سے کورٹ پولیس کی حراست سے دعا منگی اغواء برائے تاوان کیس کے مفرور ملزم کی گرفتاری کے لیے بڑے اقدامات سامنے آئے ہیں۔

پولیس ذرائع کے مطابق ملزم زوہیب علی قریشی کے ملک سے فرار کو روکنے کے لیے پولیس کی جانب سے لکھے گئے خط کے بعد امیگریشن حکام نے ملک کے تمام ایئر پورٹس پر ملزم کی سفری دستاویزات فراہم کر کے گھیرا تنگ کر دیا ہے۔

کراچی پولیس کی جانب سے ملزم زوہیب علی کا شناختی کارڈ بلاک کرنے کے لیے بھی نادرا کو خط لکھ دیا گیا ہے جبکہ ایسے ہی ایک اور خط پر وفاقی وزارتِ داخلہ کی جانب سے ملزم زوہیب علی قریشی کا پاسپورٹ بھی بلاک کر دیا گیا ہے۔

دعا منگی کیس: مفرور ملزم کو پرائیویٹ گاڑی میں لانے کا انکشاف

کراچی میں ہائی پروفائل دعا منگی اغواء کیس کے مرکزی ملزم زوہیب قریشی کے شاپنگ مال سے فرار کے حوالے سے انکشاف ہوا ہے کہ ملزم کو پولیس اہلکار قیدیوں کی وین میں نہیں بلکہ پرائیویٹ گاڑی میں لائے تھے۔

پولیس ذرائع کے مطابق کراچی میں طارق روڈ سے فرار ہونے والے ملزم زوہیب قریشی کے تمام بینک اکاؤنٹس منجمد کرنے کی اسٹیٹ بینک آف پاکستان کو درخواست کر دی گئی ہے۔

پولیس حکام کے مطابق زوہیب قریشی کی گرفتاری کے لیے پولیس کی غیر معمولی کوششیں جاری ہیں اور اس سلسلے میں ہر ممکن اقدامات بھی کیے جا رہے ہیں۔