فاروق ستار کا آصف زرداری سے سیاست سیکھنے کا مشورہ

06 فروری ، 2022

متحدہ قومی موومنٹ (ایم کیو ایم ) پاکستان کے سابق سربراہ فاروق ستار نے آصف زرداری سے سیاست سیکھنے کا مشورہ دےد یا۔

کراچی میں میڈیا سے گفتگو میں فاروق ستار نے کہا کہ الٹی گنتی شروع ہوگئی ہے، سیاسی منظر نامے کو بھی سمجھو،آصف زرداری اور نواز شریف کے درمیان رابطہ ہوا ہے۔

انہوں نے کہا کہ میں نے کوئی نئی پارٹی نہیں بنائی، میرا جینا مرنا ایم کیو ایم کی سوچ و فکر کے ساتھ ہے۔

فاروق ستار نے مزید کہا کہ یہ تحریک ہے، نظریہ ایک ہے، ہمارے مسائل ہیں، تنظیمی اختلافات ہیں، 26 جنوری کو بہادر آباد گیا، عزت،وقار اور تحریک کو بچانے گیا۔

ان کا کہنا تھاکہ تحفظات کوایک طرف رکھ کر بہادرآباد گیا، اس وقت قوم مجھے اور خالد مقبول کو ایک ساتھ دیکھنا چاہتی ہے، ملاقات میں عامر خان میرے ساتھ بیٹھے۔

ایم کیو ایم کے سابق سربراہ نے یہ بھی کہا کہ اپنی ساری حمایت خالد مقبول کو دینے گیا تھا، جیل بھرو تحریک شروع کریں تو میں جاؤں گا، اسی طرح مخالفین کا مقابلہ کرسکتے ہیں۔

انہوں نے کہا کہ خالد مقبول بھائی تالی دونوں ہاتھوں سے بجتی ہے، آپ صرف میرا ہاتھ پکڑ کر کہہ دیتے کہ میں آپ کو جانے نہیں دوں گا۔

فاروق ستار نے کہا کہ ڈیڑھ سال سے سہولت کار اور بارہ گروپ خالد مقبول اور مجھے ملوانے کی کوشش کر رہے ہیں، مجھے کونسی سربراہی چاہیے، آپ کے ساتھ مل کر کام کرنا چاہتا ہوں۔

اُن کاکہنا تھا کہ مہاجر قومی موومنٹ کے سربراہ نے بھی اتحاد کی بات کی ہے، سب کو ملانے کا موقع اللہ نے دیا ہے، یہ ٹرین اگر نکل گئی تو پھر پتا نہیں کب اسٹیشن پر آئے گی۔

ایم کیو ایم کے سابق سربراہ نے کہا کہ بلدیاتی نظام بااختیار ہونا ہر پاکستانی کا مسئلہ ہے، پاکستان کے آئینی ادارے نے ہمارے موقف کو تسلیم کیا ہے، تمام بلدیاتی امور میئر کے ماتحت ہونےچاہیے۔

انہوں نے کہا کہ مردم شماری سے متعلق عدالت میں درخواست دائر کریں تو آبادی کا مکمل نمبر سامنے آئے گا، کوٹہ سسٹم کا معاملہ بھی اسی طرح حل ہوسکتا ہے۔

قومی خبریں سے مزید