فرمان الہی
نماز کے اوقات
پنجاب اسمبلی کے اسپیکر چوہدری پرویز الہٰی نے اسمبلی کا اجلاس 16 مئی تک ملتوی کر دیا۔
پنجاب اسمبلی کا اجلاس ملتوی کرنے کا نوٹیفکیشن بھی جاری کر دیا گیا ہے۔
اس سے قبل آج صبح پولیس نے ایکشن لیتے ہوئے پنجاب اسمبلی کے گریڈ 20 کے افسر عنایت اللّٰہ لک کو حراست میں لے لیا۔
سیکریٹری کوآرڈینیشن پنجاب اسمبلی عنایت اللّٰہ لک کو گورنر ہاؤس کے باہر سے حراست میں لیا گیا اور لاہور کے تھانہ گڑھی شاہو منتقل کر دیا گیا۔
عنایت اللّٰہ لک عدالت جا رہے تھے کہ پولیس نے ایکشن کیا، یہ نہیں بتایا گیا کہ انہیں کس مقدمے میں حراست میں لیا گیا ہے۔
واضح رہے کہ پنجاب اسمبلی میں ڈپٹی اسپیکر دوست محمد مزاری کے خلاف تحریکِ عدم اعتماد پر آج اجلاس ہونا تھا۔
اس حوالے سے اسمبلی کے اندر اور باہر پولیس کی بھاری نفری تعینات کی گئی، ایس ایس پی آپریشن مستنصر فیروز اور ڈپٹی کمشنر بھی پنجاب اسمبلی میں موجود تھے۔
حکام کی جانب سے پولیس کو کسی بھی ممکنہ صورتِ حال سے نمٹنے کے لیے ہدایات جاری کی گئی تھیں۔
دوسری جانب لاہور ہائی کورٹ نے حمزہ شہباز کی آج بطور وزیرِ اعلیٰ حلف برداری کا حکم دے رکھا ہے۔
عدالتِ عالیہ نے اپنے حکم میں کہا ہے کہ گورنر خود یا نمائندے کے ذریعے حلف برداری یقینی بنائیں۔
