عمران خان کے مریم پر ریمارکس، ریشم شدید برہم

22 مئی ، 2022

پاکستان کی معروف اداکارہ ریشم نے چیئرمین پی ٹی آئی عمران خان کے مریم نواز پر دیے گئے بیان پر شدید برہمی کا اظہار کیا ہے۔

ریشم نے فوٹو اینڈ ویڈیو شیئرنگ ایپ انسٹاگرام پر عمران خان اور مریم نواز کا فوٹو کولاج شیئر کیا۔

اپنی پوسٹ کے کیپشن میں ریشم نے لکھا کہ ’کسی عورت کے بارے میں یہ تضحیک آمیز الفاظ وہ شخص کہہ رہا ہے جو اس سے پہلے بھی یہ بیان دے چکا ہے کہ عورت کا لباس مردوں کو ترغیب دیتا ہے اور یہ اس پسِ منظر میں تھا جب ہر دوسرے دن کم عمر بچیاں مردوں کی ہوس کا شکار بن رہی تھیں۔‘

اداکارہ نے کہا کہ ’ایک شخص جس نے ہمیشہ عورت کے لیے گندے اور گھٹیا الفاظ استعمال کیے۔‘

اُنہوں نے سوالیہ انداز میں کہا کہ ’کیا عمران خان کے جلسوں میں جوق در جوق جانے والی عورتیں نہیں سمجھ پا رہیں کہ انہی کی ہم جنس کے بارے میں ان کے لیڈر کی یہ مکروہ رائے دراصل ان عورتوں کی بھی تضحیک ہے کہ جو عمران خان کو اپنا نام نہاد نجات دہندہ سمجھ کر بیٹھی ہیں۔‘

یاد رہے کہ عمران خان نے ملتان میں جلسے سے خطاب کرتے ہوئے کہا تھا کہ مریم اتنے جذبے اور جنون سے میرا نام نہ لیا کرو کہیں تمہارا خاوند ہی ناراض نہ ہوجائے۔

عمران خان کے اس بیان کے بعد سے سوشل میڈیا پر سیاسی شخصیات سمیت عام عوام بھی اُنہیں شدید تنقید کا نشانہ بنا رہی ہے۔

انٹرٹینمنٹ سے مزید