شیرانی کے جنگلات میں لگی آگ سے آبادی کو کوئی خطرہ نہیں، کنزرویٹر محکمہ جنگلات

23 مئی ، 2022

کنزرویٹر محکمہ جنگلات امین مینگل کا کہنا ہے کہ بلوچستان کے علاقے شیرانی کے قدیم جنگلات میں لگی آگ سے آبادی کو کوئی خطرہ نہیں۔

کوئٹہ میں میڈیا سے گفتگو کرتے ہوئے امین مینگل نے کہا کہ آگ سے ممکنہ طور پر متاثر ہونے والے7 گھرانوں کو محفوظ مقام پر منتقل کیا جارہا ہے۔

محکمہ جنگلات کے کنزرویٹر کا کہنا تھا کہ شیرانی کے جنگلات میں آگ پر کنٹرول کے لیے کوششیں کی جارہی ہیں، آگ 10ہزار 700 ایکٹر کے رقبے پر پھیلی ہوئی ہے۔

انہوں نے مزید کہا کہ کوہ سلیمان رینج میں زرغون زور کے مقام پر آگ کو بڑھنے سے روک دیا ہے، آگ پر قابو پانے کیلئے زرغون زور تک 9 کلومیٹر کی فائرلائن بنادی ہے۔

ان کا یہ بھی کہنا تھا کہ آگ سے تورغر، چمازئی، شرغلئی اور زرغون زور میں جنگلات کو کافی نقصان پہنچا، جس سے چلغوزے، زیتون کے جنگلات، مارخور اور پرندوں سمیت جنگلی حیات متاثر ہوئی ہے۔

امین مینگل نے کہا کہ آگ بجھانے کے آپریشن میں پی ڈی ایم اے اور این ڈی ایم اے کی ٹیم بھی حصہ لے رہی ہے۔

یہ بھی پڑھیے

خیال رہے کہ 9 مئی کو مغل کوٹ کے جنگلات سے شروع ہونے والی آگ شیرانی کے جنگلات تک پھیل چکی ہے۔

جنگل، جنگلی حیات اور مقامی آبادی کے تحفظ کے لئے فارسٹ رینجز زونز میں دفعہ 144نافذ کرکے فارسٹ رینجز اور زون میں آگ جلا کر پکنک منانے سمیت ہر قسم کی عوامی سرگرمیوں پر پابندی عائد کردی گئی ہے۔

صوبائی محکمہ داخلہ نے پابندی سےمتعلق اعلامیہ جاری کردیا، آگ کی وجہ سے اٹھنے والا دھواں کئی کلومیٹر سے دیکھا جا سکتا ہے۔

قومی خبریں سے مزید