فرمان الہی
نماز کے اوقات
وزیر اعظم شہباز شریف نے کہا ہے کہ 28 مئی1998 کو چاغی کے پہاڑوں میں بلند ہونے والے نعرہ تکبیر کی گونج آج بھی جاری ہے، دفاع پاکستان کا یہ تمغہ بلوچستان کی دھرتی کے سینے پر سجا۔
وزیراعظم شہباز شریف نے یومِ تکبیر کے موقع پر خصوصی پیغام جاری کرتے ہوئے کہا کہ یہ پاکستان کا اپنی آزادی، خود مختاری اور دفاع پر سمجھوتہ نہ کرنے کے اظہار کا دن ہے، جوہری پروگرام کے معمار شہید ذوالفقار علی بھٹو کو خراجِ عقیدت پیش کرتے ہیں۔
وزیراعظم شہباز شریف نے کہا کہ پاکستان کا سر فخر سے بلند کرنے والے محبِ وطن کو خراجِ تحسین پیش کرتے ہیں، سائنسدان، انجینئرز، جوہری پروگرام کو پروان چڑھانے والا ہر فرد لائق تحسین ہے۔
شہباز شریف نے کہا کہ مسلح افواج نے جوہری پروگرام کے لیے جو خدمات انجام دیں وہ تاریخ کا سنہری باب ہے، پاکستان اٹامک انرجی کمیشن کو خراجِ تحسین پیش کرتے ہیں۔
اُنہوں نے کہا کہ محسن پاکستان ڈاکٹر عبدالقدیر خان کو خراجِ عقیدت پیش کرتے ہیں، ہم اپنے اِن تمام محسنوں کو بھول نہیں سکتے جنہوں نے قوم کے مفاد کے لیے عظیم قربانیاں دیں۔
وزیراعظم نے مزید کہا کہ سعودی عرب اور دوست ممالک کا شکریہ جنہوں نے معاشی پابندیوں میں پاکستان کا ساتھ دیا، پاکستان کے دفاع، سلامتی اور قومی مفادات کے لیے کسی قربانی سے دریغ نہیں کریں گے۔
