وزیر خزانہ کا قلمدان سنبھالنے کا فیصلہ پارٹی اور قیادت کا ہوگا، اسحاق ڈار

سابق وزیر خزانہ اور پاکستان مسلم لیگ (ن) کے رہنما اسحاق ڈار نے کہا ہے کہ وزیر خزانہ کا قلمدان سنبھالنے کا فیصلہ پارٹی اور قیادت کا ہوگا۔

برطانوی نشریاتی ادارے بی بی سی سے گفتگو کرتے ہوئے اسحاق ڈار کا کہنا تھا کہ اگلے ماہ پاکستان واپسی کی تیاری کر رہا ہوں، سینیٹر کا حلف اٹھاؤں گا۔

انہوں نے کہا کہ اگلے ماہ پاکستان واپسی کا ارادہ تقریباً کنفرم ہے، صحت کو درپیش چند مسائل کا علاج اگلے 10 سے 12 روز میں مکمل ہونے کی توقع ہے۔

اسحاق ڈار کو نیا پاسپورٹ مل گیا، پاکستان آنے کی تیاری بھی مکمل

ذرائع کا کہنا ہے کہ اسحاق ڈار جولائی کے تیسرے ہفتہ میں پاکستان جائیں گے، جس کے لیے سفری تیاریاں بھی مکمل کرلی گئیں۔

سابق وزیر خزانہ کا کہنا تھا کہ ڈاکٹرز اگلے چند روز میں علاج کے مکمل ہونے کے بارے میں پُرامید ہیں۔

ملک میں دائر مقدمہ سے متعلق انہوں نے کہا کہ پاکستان میں عمران نیازی کی جانب سے دائر کیا جانے والا کیس جعلی مقدمہ ہے۔ یہ کیس میرے ٹیکس ریٹرن پر بنایا گیا جبکہ میں نے ٹیکس ریٹرن جمع کروانے میں کبھی تاخیر نہیں کی۔

اسحاق ڈار کا کہنا تھا کہ کیس میں جان ہی نہیں تھی اس لیے انٹرپول نے مجھے کلین چٹ دے دی تھی۔