شاہ محمود نے پیپلز پارٹی میں جانے سے متعلق باتوں کا جواب دے دیا

پاکستان تحریک انصاف (پی ٹی آئی) کے رہنما اور سابق وزیر خارجہ شاہ محمود قریشی نے پیپلز پارٹی میں جانے سے متعلق کی جانے والی باتوں کا دو ٹوک جواب دے دیا۔

ملتان میں میڈیا سے گفتگو کرتے ہوئے شاہ محمود قریشی نے کہا کہ راجا ریاض کہہ رہے ہیں میں پیپلز پارٹی میں جا رہا ہوں، میں کہتا ہوں پیپلز پارٹی میں میری جوتی جاتی ہے۔

پی ٹی آئی نے میرے ہی خلاف سازش کی، شاہ محمود

شاہ محمود قریشی نے کہا کہ اس سازش سے انہیں کوئی فرق نہیں پڑا، وہ وزیر خارجہ بن گئے، مگر ملتان کو اور جنوبی پنجاب کو فرق پڑا۔

 سابق وزیر خارجہ نے کہا کہ میرا پورا خاندان عمران خان کے ساتھ ہے، مجھے نواز شریف اور آصف علی زرداری کی جانب سے دعوت تھی، میں نے سوچ سمجھ کر عمران خان کا ساتھ دیا۔

شاہ محمود قریشی نے کہا کہ کل تاریخی جلسے نے ماضی کے ریکارڈ توڑ دیے، جلسہ میں صرف مقامی لوگ تھے، یہ آزمائے ہوئے چہرے ہیں، قوم نے انہیں مسترد کردیا ہے۔

انہوں نے کہا کہ پی ٹی آئی کے نوجوانوں کو جواب دینا آتا ہے، راجا ریاض کو قائد حزب اختلاف کہتے ہوئے شرم آنی چاہیے۔

شاہ محمود قریشی نے کہا کہ خاتون جن کا سیاست سے تعلق نہیں، ان کے خلاف باتوں کی مذمت کرتا ہوں۔

انہوں نے مزید کہا کہ ہر گھر میں ماں اور بہنیں ہیں شائستگی کے دامن کو نہ چھوڑیں۔

پی ٹی آئی وائس چیئرمین کا کہنا تھا کہ ہم نے الیکشن مہم پُرامن طریقے سے چلائی ہے، یہ 20 حلقے ان کی زندگی موت کا سوال ہیں، سوچ رہے ہیں ان کو نیم وزیراعلیٰ کہا جائے۔