لال سنگھ چڈھا معاملے پر عامر خان نے معافی مانگ لی؟

01 ستمبر ، 2022

کیا نامور بھارتی اداکار عامر خان نے اپنی فلم لال سنگھ چڈھا کی ناکامی کے بعد سوشل میڈیا پر مداحوں سے معافی مانگ لی؟

مائیکرو بلاگنگ ویب سائٹ ٹوئٹر پر عامر خان کی پروڈکشن کمپنی کی جانب سے ایک آڈیو پیغام جاری کیا گیا۔

بھارتی میڈیا کے مطابق اس آڈیو پیغام میں سنا جاسکتا ہے کہ ’میں نے کسی بھی طرح جانے انجانے میں اپنے الفاظ یا پھر عمل سے آپ کا دل دُکھایا ہے تو میں آپ سے معافی کا طلب گار ہوں۔‘

اس آڈیو کلب میں یہ الفاظ کہے گئے کہ ’ہم سب انسان ہیں اور غلطیاں انسان سے ہی ہوتی ہیں، کبھی بول سے، کبھی حرکتوں میں، کبھی مذاق میں۔‘

اس میں پھر دہرایا گیا کہ ’اگر میں نے کسی بھی طرح آپ کا دل دُکھایا ہے تو میں آپ سے معافی چاہتا ہوں۔‘

واضح رہے کہ یہ آڈیو کلپ تو عامر خان کی پروڈکشن کمپنی کے سوشل میڈیا اکاؤنٹ پر شیئر کیا گیا لیکن یہ نہیں بتایا گیا کہ آڈیو پیغام میں آواز کس کی ہے؟

پیغام شیئر ہونے کے کچھ دیر بعد ہی اسے ڈیلیٹ کردیا گیا، جبکہ اس حوالے سے کچھ صارفین کا ماننا ہے کہ ان کا اکاؤنٹ ہیک ہوگیا ہے، تاہم اکاؤنٹ کے ہیک ہونے کا نہ ہونے سے متعلق بھی کوئی اطلاع سامنے نہیں آئی۔

انٹرٹینمنٹ سے مزید