• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

وزیراعلیٰ پنجاب چوہدری پرویز الہٰی سے امریکی سفیر ڈونلڈ بلوم کی ملاقات

تازہ ترین
قومی خبریں
28 ستمبر ، 2022
وزیراعلیٰ پنجاب چوہدری پرویز الہٰی سے امریکی سفیر ڈونلڈ بلوم کی ملاقات

وزیراعلیٰ پنجاب چوہدری پرویز الہٰی سے امریکی سفیر ڈونلڈ بلوم نے لاہور میں ملاقات کی ہے۔

چوہدری پرویز الہٰی اور ڈونلڈ بلوم کی ملاقات میں دو طرفہ تعلقات کے فروغ اور مختلف شعبوں میں تعاون بڑھانے پر تبادلہ خیال ہوا۔

خوشحال پاکستان خطے اور امریکا کے مفاد میں ہے، امریکی سفیر ڈونلڈ بلوم

امریکی سفیر ڈونلڈ بلوم نے کہا ہے کہ خوشحال پاکستان خطے اور امریکا کے مفاد میں ہے، دونوں ممالک کے تعلقات ایک نئے دور میں داخل ہو رہے ہیں۔

دوران گفتگو زراعت، متبادل توانائی، بہبود آباد اور واٹر مینجمنٹ کے شعبوں میں شراکت داری کو فروغ دینے پر بھی اتفاق کیا گیا۔

وزیراعلیٰ پنجاب نے کورونا وبا کے دوران پاکستان کی مدد کرنے پر امریکی سفیر کا شکریہ ادا کیا اور کہا کہ ہم امریکا کے ساتھ تعلقات کو خصوصی اہمیت دیتے ہیں۔

انہوں نے ڈونلڈ بلوم کو بتایا کہ تعلیم، صحت، زراعت، متبادل توانائی کے شعبوں میں اصلاحات لارہے ہیں، اس ضمن میں امریکا کی تکنیکی معاونت کا خیرمقدم کریں گے۔

چوہدری پرویز الہٰی نے مزید کہا کہ میرے سابقہ دور کے ایجوکیشن ریفارمز پروگرام کو عالمی سطح پر سراہا گیا، ہم نے آتے ہی ڈگری تک تعلیم اور کتابیں فری کردیں۔

اُن کا کہنا تھا کہ تعلیمی اداروں کو منشیات سے پاک کرنے کےلئے قانون سازی کا فیصلہ کیا ہے، امریکی معاونت منشیات سے پاک پنجاب کے مشن میں ممد و معاون ثابت ہوگی۔

وزیراعلیٰ پنجاب نے سفیر کو بتایا کہ انسداد منشیات کےلیےخصوصی فورس بنے گی، منشیات کی خرید و فروخت کی اطلاع دینے والےکو حکومت انعام دے گی۔

انہوں نے کہا کہ انسدادمنشیات کےحوالے سے پنجاب حکومت، امریکی تعاون کا خیرمقدم کرتی ہے۔

چوہدری پرویز الہٰی نے یہ بھی کہا کہ کوہ سلیمان کے پانی کو چینلائز کرنے پر دوبارہ کام شروع کردیا ہے، یہاں چھوٹے ڈیمز بنائیں گے جبکہ دریائے چناب پر 2 بڑے ڈیمز کا منصوبہ بنارہے ہیں۔

قومی خبریں سے مزید