وزیراعظم نے عمران خان سے سازش کے الزام کے شواہد مانگ لیے

05 نومبر ، 2022

وزیراعظم شہباز شریف نے چیئرمین پاکستان تحریک انصاف (پی ٹی آئی) عمران خان کو استعفیٰ دینے کی مشروط پیشکش کردی۔

لاہور میں پریس کانفرنس کے دوران وزیراعظم شہباز شریف نے کہا کہ اداروں کے خلاف الزامات پر کارروائی کرنا میرا فرض ہے۔

انہوں نے کہا کہ عمران خان کہتے ہیں کہ بند کمرے میں بیٹھ کر 3 افراد نے سازش کی، آپ نے وزیراعظم ، وفاقی وزیر داخلہ اور ایک فوجی افسر پر الزام لگایا ہے۔

شہباز شریف نے مزید کہا کہ عمران خان شواہد دیں، رتی برابر بھی میرا اس سازش کا حصہ ہونا ثابت ہوا تو عہدے سے استعفیٰ دے کر سیاست چھوڑ دوں گا۔

ان کا کہنا تھاکہ عمران خان کے پاس ثبوت ہیں اور وہ ماضی کی طرح جھوٹ نہیں بول رہے تو قوم کے سامنے شواہد لائیں تو مجھے ایک منٹ وزیراعظم رہنے کا حق نہیں ہے۔

وزیراعظم نے یہ بھی کہا کہ آپ لوگوں کو ڈراتے دھمکاتے رہے ہیں، مجھ پر، وزیر داخلہ پر، اور ادارے کے ایک افسر پر جھوٹا الزام لگایا گیا۔

انہوں نے کہا کہ عمران خان سر سے پاؤں تک جھوٹ کا مجسمہ ہے، سوشل میڈیا پر ادارے کے خلاف گندی اور فحش گالیاں چلنے پر بھارت میں خوشیاں منائی جارہی ہیں۔

شہباز شریف نے کہا کہ پنجاب حکومت، صوبے کی پولیس، اسپیشل برانچ اور آئی بی عمران خان کی ہے، وہ خود پر ہوئے حملے کی تحقیقات کرائیں، جو بھی تعاون چاہیے وہ ہم کرنے کو تیار ہیں۔

ان کا کہنا تھا کہ حملہ آور کی ویڈیو سامنے آئی ہے، وہ اپنا جرم قبول کر رہا ہے، اگر عمران خان پر وزیرآباد میں ہونے والے حملے کی ایف آئی آر نہیں کٹ رہی تو وہ پنجاب حکومت سے پوچھیں۔

وزیراعظم نے کہا کہ عمران خان نیازی میرا منہ نہ کھلوائیں، میرے سینے میں بہت سے راز ہیں، آپ کے پاس حکومت نہیں رہی، آئینی طریقے سے حکومت ہٹائی گئی۔

انہوں نے کہا کہ جس ادارے نےاتنی قربانیاں دیں آپ اس کےخلاف بول رہے ہیں، کوئی گیا گزرا شخص بھی اس ادارے کےخلاف ایسی باتیں نہیں کرسکتا۔

قومی خبریں سے مزید