برطانیہ کے شاہ چارلس سوم کو آج اس وقت ناخوشگوار صورتحال کا سامنا کرنا پڑا جب وہ شمالی انگلینڈ کے شہر یارک پہنچے جہاں ایک احتجاج کرنے والے شخص نے ان کی جانب انڈہ اچھالا اور چند غیر مہذبانہ جملے بھی ادا کیے۔
خبر ایجنسی کے مطابق شاہ چارلس پر انڈہ مارنے کی کوشش کے موقع پر ملکہ کمیلا پارکر ان کے ساتھ موجود تھیں اور دونوں ایک تقریب میں شرکت کے لیے پہنچے تھے۔
اس دوران مذکورہ بالا شخص نے متعدد انڈے انکی جانب پھینکے جو کہ انھیں، ان کی اہلیہ یا ساتھ موجود کسی مہمان کو تو نہیں لگے لیکن قریب ہی زمین پر گر کر ٹوٹ گئے۔
اس دوران شاہ چارلس نے یہ منظر بغور دیکھا اور پھر وہ وہاں موجود لوگوں کو دیکھ کر ہاتھ لہرا کر خیرمقدمی نعروں کا جواب دیتے رہے۔
خبر ایجنسی کے مطابق پولیس نے انڈہ پھینکنے والے شخص کو حراست میں لے لیا۔