پنڈی میں روسی یا افغانی نہیں، پاکستانی عوام آ رہے ہیں: اسد عمر

25 نومبر ، 2022

پاکستان تحریکِ انصاف (پی ٹی آئی) کے رہنما، سابق وفاقی وزیر اسد عمر کا کہنا ہے کہ پنڈی میں روس یا افغانستان کے لوگ نہیں آ رہے، پاکستان کے عوام آ رہے ہیں۔

یہ بات پاکستان تحریکِ انصاف (پی ٹی آئی) کے رہنما، سابق وفاقی وزیر اسد عمر نے جاری کیے گئے بیان میں کہی ہے۔

ان کا یہ بھی کہنا ہے کہ اگر ہمیں راولپنڈی میں مزید رہنا پڑا توپنڈی انتظامیہ سے بات کر لیں گے، جلسے کا مرکزی اسٹیج پنڈی کی حدود میں قائم ہو گا۔

’’عمران خان کا ہیلی کاپٹر اترنے کی اجازت مسترد ہو گئی‘‘

اس سے قبل سماجی رابطے کی ویب سائٹ ٹوئٹر پر جاری کیے گئے ایک بیان میں اسد عمر کا کہنا تھا کہ اسلام آباد کی انتظامیہ نے عمران خان کے ہیلی کاپٹر کو پریڈ گراؤنڈ اترنےکی اجازت مسترد کر دی۔

ان کا مزید کہنا تھا کہ اسلام آباد کی انتظامیہ کی جانب سے اجازت مسترد کرنے کی کوئی وجہ نہیں دی گئی کیونکہ کوئی وجہ ہو ہی نہیں سکتی۔

اسد عمر کا یہ بھی کہنا تھا کہ جان بوجھ کر اسلام آباد کی انتظامیہ عمران خان کی زندگی کے لیے خطرہ بڑھانے کی کوشش کر رہی ہے۔