ملتان ٹیسٹ کے پہلے دن کا کھیل ختم ہوگیا، پاکستان نے اپنی پہلی اننگز میں 2 وکٹ پر 107 رنز بنالیے۔

پاکستان اور انگلینڈ کے درمیان دوسرا ٹیسٹ میچ ملتان میں کھیلا جارہا ہے، پہلے دن انگش ٹیم 281 رنز بناکر آؤٹ ہوگئی۔

جس کے جواب میں گرین کیپ نے دن کے اختتام تک 2 وکٹ پر 107 رنز بنالیے ہیں، بابراعظم 61 اور سعود شکیل 32 رنز بناکر وکٹ پر موجود ہیں۔

پاکستان کی اوپننگ جوڑی عبداللّٰہ شفیق 14 اور امام الحق صفر پر پویلین لوٹ گئے، جمی اینڈرسن اور جیک لیچ نے 1،1 وکٹ حاصل کی، یوں پہلے دن کے خاتمے تک انگلش ٹیم کو 174 رنز کی برتری حاصل ہے۔

انگلینڈ کی پہلی اننگز کے جواب میں پاکستان کا آغاز اچھا نہ ہوا، جیمز اینڈرسن نے تیسرے اوور میں ہی امام الحق کو صفر پر آؤٹ کردیا۔

انگلینڈ کے اسپن بولر جیک لیچ نے عبداللّٰہ شفیق کو 14 رنز پر آؤٹ کیا۔

انگلینڈ کی جانب سے زیک کرولی اور بین ڈیکیٹ نے اننگز کا آغاز کیا اور یہ پارٹنرشپ صرف 9 اوورز ہی قائم رہ سکی۔

پہلا میچ، پہلا اوور اور پہلی وکٹ

پاکستان میں مسٹری اسپنر کے نام سے مشہور ابرار احمد نے اپنے پہلے ہی اوور میں وکٹ حاصل کر کے سب کی توجہ اپنی طرف کرائی۔

انہوں نے زیک کرولی کو 19 رنز پر بولڈ کیا۔

پہلی وکٹ گرنے کے بعد انگلش بیٹرز کی تیز رن ریٹ کے ساتھ بیٹنگ کرنے کا انداز اپنایا، اس دوران بین ڈیکیٹ اور اولی پوپ کے درمیان 79 رنز کی پارٹنرشپ قائم ہوئی۔

ڈیبیو میچ کھیلنے والے ابرار احمد نے ہی انگلینڈ کی دوسری پارٹنرشپ 117 رنز پر توڑی جب انہوں نے  بین ڈیکیٹ کو 63 رنز پر ایل بی ڈبلیو کیا۔

انگلش ٹیم کی تیسری وکٹ بھی ابرار احمد نے حاصل کی۔

ابرار احمد نے جو روٹ کو 8 رنز پر ایل بی ڈبلیو آؤٹ کیا۔

ابرار کے لگاتار 7 شکار

ڈیبیو کرنے والے بولر نے انگلش بیٹرز کو پریشان کیے رکھا اور اس دوران انہوں نے  164 رنز پر چوتھی وکٹ بھی حاصل کی۔

انگلش بیٹر اولی پوپ کو ابرار احمد نے 60 رنز پر آؤٹ کیا۔

ابرار احمد نے انگلینڈ کے بیٹرز کو اسپن کے جال میں پھنسائے رکھا اور پانچویں وکٹ بھی حاصل کی۔

انہوں نے ہیری بروک کو 9 رنز پر آؤٹ کیا۔

پاکستان کے مسٹری اسپنر نے کھانے کے وقفے کے بعد بھی انگلش بیٹرز کو پویلین بھیجنے کا سلسلہ جاری رکھا۔

انگلینڈ کے 228 کے مجموعی اسکور پر ابرار احمد نے کپتان بین اسٹوکس کو 30 رنز پر آؤٹ کیا، یوں انہوں نے لگاتار 6 وکٹیں حاصل کیں۔

ابرار احمد ڈیبیو ٹیسٹ کے پہلے دن 5 وکٹیں لینے والے پہلےپاکستانی اسپنر بن گئے

ملتان میں انگلینڈ کے خلاف ڈیبیو کرنے والے ابرار احمد کا پہلا میچ توجہ کا مرکز اور یادگار بن گیا۔

انگلینڈ کی ساتویں وکٹ 231 رنز پر ابرار احمد نے ہی حاصل کی جب انہوں نے ول جیکس کو ایل بی ڈبلیو آؤٹ کیا۔

ایک موقع پر لگ رہا تھا کہ انگلینڈ کی تمام وکٹس ابرار احمد ہی حاصل کریں گے تاہم زاہد محمود نے ایسا نہ ہونے دیا۔

زاہد محمود نے انگلینڈ کے اولی رابنسن، جیک لیچ اور جیمز اینڈرسن کو آؤٹ کیا۔ 

2 پاکستانی اسپنرز نے پوری انگلش ٹیم کو آؤٹ کردیا

پہلی اننگز میں ابرار احمد نے مجموعی طور پر 22 اوورز کرا کر 7 انگلش کھلاڑیوں کو آؤٹ کیا جبکہ زاہد محمود نے 7.4 اوورز میں 3 وکٹیں حاصل کیں۔

پاکستان کے فہیم اشرف، محمد علی اور محمد نواز پہلی اننگز میں کوئی وکٹ حاصل نہ کرسکے۔

دوسرے میچ کے لیے پاکستان ٹیم میں 3 اور انگلینڈ کی ٹیم میں ایک تبدیلی کی گئی ہے۔

آج کے میچ میں اظہر علی، نسیم شاہ اور حارث رؤف کی جگہ فہیم اشرف، محمد نواز اور ابرار احمد کو پاکستان ٹیم میں شامل کیا گیا ہے۔

انگلینڈ نے لیام لیونگسٹن کی جگہ مارک ووڈ کو پلیئنگ الیون میں شامل کیا ہے۔

پاکستان کرکٹ ٹیم کے کپتان بابر اعظم نے ٹاس کے موقع پر کہا کہ اگر ہم ٹاس جیت جاتے تو بیٹنگ ہی کرتے۔

پاکستان کی پلیئنگ الیون

پاکستان ٹیم میں عبداللّٰہ شفیق، امام الحق، بابر اعظم، محمد رضوان، آغا سلمان، سعود شکیل، محمد نواز، فہیم اشرف، زاہد محمود، محمد علی اور ابرار احمد شامل ہیں۔

انگلینڈ کی پلیئنگ الیون

بین ڈیکیٹ، زیک کرولی، اولی پوپ، جو روٹ، ہیری بروک، بین اسٹوکس، ول جیکس، اولی رابنسن، جیک لیچ، مارک ووڈ اور جیمز اینڈرسن انگلیند ٹیم کا حصہ ہیں۔

واضح رہے کہ دونوں ٹیموں کے درمیان 3 ٹیسٹ میچوں کی سیریز کا پہلا میچ راولپنڈی میں کھیلا گیا تھا جس کا نتیجہ پانچویں دن انگلینڈ کی جیت کی صورت میں سامنے آیا تھا۔