پی ٹی آئی نے ایڈمنسٹریٹرز کی تقرری کو عدالت میں چیلنج کردیا

پاکستان تحریک انصاف (پی ٹی آئی) نے الیکشن شیڈول کے بعد سیاسی بنیادوں پر ایڈمنسٹریٹرز کی تقرری کو سندھ ہائی کورٹ میں چیلنج کر دیا۔

پی ٹی آئی کراچی کے صدر بلال غفار نے شہاب امام ایڈووکیٹ کے توسط سے درخواست دائر کی۔

تحریک انصاف کی جانب سے درخواست میں مؤقف اپنایا گیا ہے کہ فرقان اطیب، شکیل اور محمد شریف کو کراچی کے اضلاع میں ایڈمنسٹریٹرز تعینات کیا گیا ہے، یہ افسران متحدہ قومی موومنٹ کی رابطہ کمیٹی کے بھی ارکان ہیں۔

پی ٹی آئی کا ایڈمنسٹریٹر کراچی کی تعیناتی چیلنج کرنے کا اعلان

پاکستان تحریک انصاف (پی ٹی آئی ) نے ایڈمنسٹریٹر کراچی کی تعیناتی کو سندھ ہائی کورٹ میں چیلنج کرنے کا اعلان کردیا۔

درخواست میں کہا گیا ہے کہ ان افسران کی سیاسی بنیادوں پر تقرری بلدیاتی انتخابات پر اثرانداز ہونے کی کوشش ہے، سیف الرحمٰن کو ایڈمنسٹریٹر کراچی بھی تبادلے و تقرریوں پر پابندی کے بعد تعینات کیا گیا۔

درخواست میں استدعا کی گئی ہے کہ حکومت سندھ ایم کیو ایم کے ساتھ مل کر انتخابی قوانین کی دھجیاں بکھیر رہی ہے، انتخابی قوانین سے متصادم یہ تعیناتیاں غیرقانونی اور کالعدم قرار دی جائیں۔