سراج الحق کی عمران خان، شہباز شریف اور آصف زرداری پر کڑی تنقید

22 جنوری ، 2023

امیر جماعت اسلامی پاکستان سراج الحق نے عمران خان، شہباز شریف اور آصف علی زرداری پر کڑی تنقید کی ہے۔

راولپنڈی میں ورکرز کنونشن سے خطاب میں سراج الحق نے کہا کہ لنگر خانے بنانے والے کو مزید موقع دیا جاتا تو وہ پاگل خانے بھی بنا دیتا۔

انہوں نے کہا کہ شہباز شریف، آصف زرداری اور عمران خان کی وجہ سے پاکستان کے 23 کروڑ عوام آئی ایم ایف کے مقروض ہیں۔

امیر جماعت اسلامی پاکستان نے مزید کہا کہ جماعت اسلامی کو موقع ملا تو پیپلز پارٹی، ن لیگ اور عمران خان کی جائیدادیں بیچ کر پاکستان کا قرضہ اتاریں گے۔

انہوں نے دعویٰ کیا کہ وہ جب دو بار خیبر پختونخوا کے وزیر خزانہ رہے، تو اس وقت صوبے پر ایک روپیہ بھی قرضہ نہیں تھا، آج پی ٹی آئی کی حکومت میں صوبے پر ایک ہزار ارب روپے کا قرضہ ہے۔

سراج الحق نے یہ بھی کہا کہ موجودہ سیاسی جماعتوں میں جمہوریت نہیں، باپ بیٹا سب عہدوں کی دوڑ میں بھاگ رہے ہیں جبکہ ملک بےپناہ مسائل کا گڑھ بن چکا ہے۔

ان کا کہنا تھا کہ ملک کا مسئلہ حکمرانوں کا منصف نہ ہونا اور مافیا کا حصہ ہونا ہے۔ پراپرٹی، چینی، آٹا، یوریا، سیمنٹ مافیا کے افراد جب کسی نا کسی جماعت کا حصہ ہو کر حکمران ہوں تو غریب شہریوں کا احساس کون کرے گا؟

امیر جماعت اسلامی نے کہا کہ آمرانہ جمہوریت نے پاکستان کو معاشی اور معاشرتی تباہی سے دوچار کیا ہے۔

انہوں نے کہا کہ شیخ رشید چاہتے ہیں کہ نالہ لئی 50 سال مزید نہ بن سکے، اگر نالہ لئی بن گیا تو یہ سیاست کس پر کریں گے۔

انہوں نے کہا کہ توشہ خانہ ایک نے نہیں سب نے لوٹا ہے، پی ڈی ایم اور پی ٹی آئی نے مل کر نیب کو ختم کیا تاکہ احتساب نہ ہو۔

سراج الحق نے کہا کہ انہوں نے غریب عوام کے لیے ترقی کے دروازے بند کر رکھے ہیں، ملک کے ذہین لوگ شناختی کارڈ ہاتھ میں لیے آٹے کے ٹرک کے پیچھے دوڑ رہے ہیں۔

قومی خبریں سے مزید