مسافر طیارے میں دوران پرواز آتشزدگی، 4 افراد زخمی

08 فروری ، 2023

امریکا کی یونائیٹڈ ایئرلائنز کے طیارے کے اُڑان بھرتے ہی اس میں آتشزدگی کا واقعہ پیش آگیا جس کے باعث 4 افراد زخمی ہوگئے۔

غیر ملکی میڈیا کی رپورٹ کے مطابق ریاست کیلیفورنیا کے سانڈیاگو انٹرنیشنل ایئرپورٹ سے ٹیک آف کرتے ہی طیارے میں موجود مسافر کے لیپ ٹاپ کے بیٹری پیک میں آگ لگ گئی۔

واقعہ رونما ہوتے ہی طیارہ واپس اسی ایئرپورٹ پر دوبارہ لینڈ کرگیا۔

میڈیا رپورٹس کے مطابق طیارے میں موجود عملے کا ایک رکن، لیپ ٹاپ رکھنے والا مسافر اور ساتھ موجود دیگر دو مسافر زخمی ہوئے جنہیں طیارہ واپس آنے کے بعد فوری طور پر اسپتال منتقل کردیا گیا۔

ایک مسافر نے میڈیا سے گفتگو کرتے ہوئے بتایا کہ جیسے ہی طیارے نے اُڑان بھری تو اس کے چند منٹ بعد ہی فرسٹ کلاس میں موجود ایک مسافر کے بیگ سے اچانک دھواں اٹھنے لگا۔

اس نے مزید بتایا کہ ’مسافر نے خود کو بچاتے ہوئے بیٹری چارجر پیک خود سے دور پھینکا جو اچانک پھٹ گیا اور اس کے باعث آگ بھڑک اٹھی۔

ایک اور مسافر نے بتایا کہ فلائٹ اٹینڈنٹ آگ بجھانے والے آلات لے کر اس جانب بڑھا اور آگ کو قابو کرلیا، تاہم اس دوران کچھ لوگ اس آگ سے جل کر زخمی بھی ہوئے۔

بین الاقوامی خبریں سے مزید