بلاول بھٹو بھارت کیلئے روانہ

وزیرِ خارجہ بلاول بھٹو شنگھائی تعاون تنظیم کے اجلاس میں شرکت کے لیے 2 روزہ دورے پر بھارت روانہ ہوگئے۔

بلاول بھٹو زرداری کراچی سے خصوصی طیارے میں بھارتی شہر گووا کے لیے روانہ ہوئے۔

وزیرِ خارجہ بلاول بھٹو زرداری کا طیارہ کراچی سے براہ راست گووا انٹرنیشنل ایئر پورٹ پر لینڈ کرے گا۔

بھارت روانگی کے وقت بلاول بھٹو کا خصوصی ویڈیو پیغام

بلاول بھٹو نے کہا کہ گوا میں پاکستانی وفد کی قیادت کروں گا، میرا بھارت جانا یہ واضح پیغام بھیجتا ہے کہ پاکستان شنگھائی تعاون تنظیم کو کتنی اہمیت دیتا ہے اور اپنی ممبر شپ کو کتنا سیریس لیتا ہے۔

گزشتہ روز بلاول بھٹو نے بھارت روانگی سے قبل مولانا فضل الرحمٰن، سراج الحق، خالد مقبول صدیقی اور دیگر رہنماؤں سے ٹیلیفونک رابطہ کیا تھا۔

ترجمان کے مطابق بلاول بھٹو نے بھارتی شہر گووا میں ہونے والے ایس سی او اجلاس میں شرکت پر مشاورت کی اور انہیں اعتماد میں لیا تھا۔