فرمان الہی
نماز کے اوقات
وزیرِ اعظم شہباز شریف نے ریڈیو پاکستان پشاور کے ملازمین کی تنخواہیں فی الفور ادا کرنے کا اعلان کر دیا۔
ڈی جی ریڈیو نے وزیرِ اعظم شہباز شریف کو بریفنگ دیتے ہوئے کہا کہ شرپسندوں نے ریڈیو پاکستان پشاور کی عمارت کو بہت نقصان پہنچایا، 100 سال سے زائد کی ریکارڈنگز اور آرکائیو جلا دیے گئے۔
اس موقع پر گفتگو کرتے ہوئے وزیر اعظم نے کہا کہ ریڈیو پاکستان کے ملازمین کے حوصلے کو داد دیتا ہوں، فنڈز 48 گھنٹوں میں فراہم کر دیے جائیں گے۔
شہباز شریف کا کہنا ہے کہ اپریل اور مئی کی تنخواہیں فی الفور ادائیگی کا اعلان کرتا ہوں، 48 گھنٹوں میں وزارت اطلاعات کے ذریعے مئی کی تنخواہ مل جائے گی۔
انہوں نے کہا کہ اسی عمارت سے 14 اگست 1947 کو آزادی کی صدائیں بلند ہوئیں، ریڈیو پاکستان پشاور نے ہی مملکت خداداد کی آزادی کا اعلان کیا، نو اور دس مئی کو دلخراش واقعات نے پاکستانی عوام کو رنجیدہ کیا۔
وزیرِ اعظم شہباز شریف کا کہنا ہے کہ تاریخی اور قومی ورثے کو جلا دینا کہاں کی حب الوطنی ہے؟ چاغی کی یادگار کو بھی راکھ بنا دیا گیا، قومیں اپنی تاریخی ورثے اور شناخت کی حفاظت کرتی ہیں، یہاں جلا دیا گیا۔
ان کا مزید کہنا ہے کہ 100 سال کے ریکارڈ اور تاریخی ورثے کو تباہ کر دیا گیا، جن لوگوں نے یہ کام کیا ہے ان میں اور دہشت گردوں میں کوئی فرق نہیں، آج عہد کرتے ہیں کہ آئندہ ایسی جرات کوئی نہ کر سکے۔
تقریب میں وزیرِ اطلاعات مریم اورنگزیب، وزیر خزانہ اسحاق ڈار، گورنر خیبرپختونخوا غلام علی اور نگراں وزیرِ اعلی کے پی محمد اعظم خان بھی موجود تھے۔
مریم اورنگزیب نے کہا کہ مسلح جتھوں کو بالکل بھی رعایت نہیں دی جائے گی، نو مئی دہرائی نہیں جا سکتی، ملوث افراد کو سخت سزا دیں گے، منصوبہ بندی کے تحت ریڈیو پاکستان پشاور کی عمارت پر حملہ کیا گیا۔
وفاقی وزیرِ اطلاعات کا کہنا ہے کہ شرپسندوں نے دس مئی کو دوبارہ انتظامات کے ساتھ حملہ کیا، تاریخی آرکائیوز جس کی کوئی قیمت نہیں تھی، جلا دیا گیا، عمارت کو بچاتے ہوئے عملے کے کئی افراد شدید زخمی ہوئے۔
