فرمان الہی
نماز کے اوقات
وزیر محنت سندھ سعید غنی نے آئندہ الیکشن میں کراچی سے 20 سیٹیں جیتنے کا دعویٰ کردیا۔
سندھ اسمبلی اجلاس سے خطاب میں سعید غنی نے کہا کہ کراچی میں ہمارے 5 رکن قومی اسمبلی (ایم این اے) ہیں، آئندہ الیکشن میں ہماری سیٹیں بڑھ جائیں گی۔
انہوں نے کہا کہ کراچی میں آئندہ الیکشن میں ہماری 20 سیٹیں ہوں گی۔
صوبائی وزیر نے مزید کہا کہ کراچی کے لوگوں کے علاج پر 82 ارب خرچ ہو رہے ہیں، اس کے باوجود کہا جاتا ہے ہم اہالیان شہر قائد پر توجہ نہیں دے رہے ہیں۔
اُن کا کہنا تھا کہ سندھ کو جن چیلنجز کا سامنا تھا اس میں متوازن بجٹ دیا گیا، بینظیر مزدور کارڈ تیزی سے بننا شروع ہوگئے ہیں۔
سعید غنی نے یہ بھی کہا کہ خاکروبوں کا گریڈ بڑھا دیا ہے، جس سے ان کی تنخواہ بڑھے گی، صوبے میں تنخواہوں میں 35 فیصد اضافہ کیا ہے۔
انہوں نے کہا کہ کہا جاتا ہے 173 والا جیت گیا اور 193 والے کو ہرا دیا گیا، پوچھتا ہوں کیا آپ کے پاس 193 ووٹ تھے؟
صوبائی وزیر نے کہا کہ جماعت اسلامی نے 20 سال میں کوئی سیٹ نہیں جیتی ہے، الخدمت کا آڈٹ کرائیں، جس کا پیسا الیکشن میں استعمال ہوا۔
ان کا کہنا تھا کہ ڈسٹرکٹ سینٹرل میں آپ جیت گئے پیٹ نہیں بھرا، ان کو نجومی نے کہا تھا میئر کا امیدوار بنیں گے، یہ سمجھے میئر بنیں گے۔
