فرمان الہی
نماز کے اوقات
وفاقی وزیر برائے قومی ورثہ اور ثقافت جمال شاہ نے 6 ستمبر کو منائے جانے والے یوم دفاع پاکستان کے سلسلے میں منعقد کی جانے والی ایک ہفتہ طویل ثقافتی سرگرمی کا باقاعدہ افتتاح کیا۔
اس سلسلے میں سر سید میموریل میوزیم میں جنگی ساز و سامان کی خصوصی نمائش کا آغاز ہوا، جس میں وفاقی سیکرٹری برائے قومی ورثہ اور ثقافت حمیرا احمد اور ڈویژن کے تمام متعلقہ محکموں کے سربراہاں نے بھی شرکت کی۔
میڈیا سے گفتگو کرتے ہوئے وفاقی وزیر برائے قومی ورثہ و ثقافت جمال شاہ نے ثقافتی اور ادبی سرگرمیوں میں بچوں اور نوجوانوں کی شرکت کی اہمیت پر روشنی ڈالی۔
قومی ورثہ اور ثقافت ڈویژن اور اس سے منسلک محکموں نے ثقافتی سرگرمیوں اور تقریبات کا ایک سلسلہ شروع کیا ہے، جس کا مقصد حب الوطنی اور شہداء کی قربانیوں کی اہمیت کو اجاگر کرنا اور ہماری نوجوان نسلوں کے دلوں میں وطن کی محبت اور احترام کو ابھارنا ہے۔
جمال شاہ کا مزید کہنا تھا کہ ثقافتی سرگرمیوں میں لائیو پرفارمنس، اسٹیج ڈرامے، پتلی تھیٹر، میوزیکل کنسرٹ، تقافتی نمائشیں، سیمینار، ٹیبلوز وغیرہ شامل ہیں۔
وفاقی وزیر نے کہا کہ یوم دفاع پاکستان اور پاکستانیوں کےلیے قومی اتحاد اور ہم آہنگی کے عزم کا اعادہ کرنے کا موقع ہے۔
انہوں نے کہا کہ 6 ستمبر ہمارے ملک کی تاریخ کا ایک اہم دن ہے، اس حوالے سے تمام متعلقہ محکموں نے ہمارے قومی ہیروز کی قربانیوں کو اجاگر کرنے کے لیے خصوصی ثقافتی تقریبات کا منصوبہ بنایا ہے۔
جمال شاہ نے یہ بھی کہا کہ اس دن کی مناسبت سے قومی نغمات کی میگا میوزیکل تقریب کا انعقاد کیا جائے گا، جس میں نامور گلوکار قومی گیت گائیں گے۔
قبل ازیں وفاقی وزیر نے محکمہ آثار قدیمہ اور میوزیم (DOAM) کی جانب سے اسلام آباد میوزیم میں نمائش کے لیے رکھے گئے جنگی نمونوں کی خصوصی نمائش کا بھی دورہ کیا۔
وفاقی وزیر نے اسلام آباد کا دورہ بھی کیا اور نمائش میں گہری دلچسپی لی اور وفاقی دارالحکومت میں جدید ترین میوزیم قائم کرنے کے عزم کا اظہار کیا۔
