فرمان الہی
نماز کے اوقات
کراچی میں طیاروں کو پرندوں اور لیزر لائٹس سے بچانے کے لیے انوائرمینٹل کنٹرول کمیٹی کا ہنگامی اجلاس ایئر پورٹ منیجر کی صدارت میں کراچی ایئر پورٹ پر ہوا۔
ہنگامی اجلاس میں کراچی ایئر پورٹ کے آس پاس پرندوں کی بڑھتی تعداد اور لیزر لائٹس کے استعمال کے حوالے سے تبادلۂ خیال کیا گیا۔
میٹنگ میں ایئر لائنز کے نمائندوں، پی اے ایف، آرمی، اے ٹی سی، ویجیلنس، لوکل گورنمنٹ اور پولیس سمیت دیگر ایئر پورٹ اسٹیک ہولڈرز نے شرکت کی۔
اجلاس میں پرندوں کے لیے پُرکشش علاقوں میں صفائی کے حوالے سے کیے گئے اقدامات پر تفصیلی بحث کی گئی جبکہ ایئر پورٹ منیجرز کو رن وے اور متصل علاقوں میں صفائی پر خاص توجہ دینے کی ہدایت کی گئی۔
اجلاس میں فیصلہ کیا گیا ہے کہ جہازوں کو لیزر لائٹ کا نشانہ بنانے والوں کے خلاف پولیس کے تعاون سے سخت ایکشن لیا جائے گا۔
ایئر پورٹ منیجرز کے مطابق لیزر لائٹس کے واقعات کی روک تھام کے لیے تمام ٹاؤن ایس ایچ اوز سے میٹنگ کا فیصلہ کیا گیا ہے۔
اجلاس میں سیفٹی کمیٹی اجلاس کے فیصلوں پر عمل درآمد پر پیش رفت کا جائزہ بھی لیا گیا اور تمام اسٹیک ہولڈرز نے شہری ہوا بازی کو محفوظ بنانے کی کاوشوں کو مزید تیز کرنے کا اعادہ کیا۔
