راولپنڈی میں 9 مئی مقدمات: سماعت نہ کرنے کی درخواست مسترد

پاکستان تحریک انصاف (پی ٹی آئی) رہنماؤں کے خلاف راولپنڈی میں 9 مئی واقعات کے مقدمات کی انسداد دہشت گردی عدالت نے سماعت نہ کرنے کی درخواست مسترد کردی۔

پنجاب حکومت نے جج آصف اعجاز کے خلاف ریفرنس دائر ہونے پر سماعت نہ کرنے کی درخواست کی تھی، ڈسٹرکٹ پراسیکیوٹر کی جانب سے ریفرنس دائر ہونے پر سماعت نہ کرنے کی درخواست کی گئی۔

جج ملک آصف اعجاز نے ڈسٹرکٹ پراسیکیوٹر کی درخواست پر حکم نامہ جاری کردیا۔

حکمنامے کے مطابق انسداد دہشت گردی عدالت نے آئندہ سماعت پر تمام ملزمان کو حاضر ہونے کی ہدایت کرتے ہوئے کہا کہ آئندہ سماعت پر ملزمان کی جانب سے بریت کی درخواست پر کارروائی ہوگی۔

عدالت نے کہا کہ ریفرنس عدالتی کارروائی یا سماعت روکنے سے متعلق نہیں ہے، درخواست کے ساتھ منسلک ریفرنس کی کاپی جیل اتھارٹی سے متعلق ہے، ڈسٹرکٹ پراسیکیوٹر نے غیر متعلقہ ریفرنس کو بنیاد بنا کر سماعت روکنے کی درخواست کی، پراسیکیوشن کی جانب سے بدنیتی پر مبنی درخواست کے پیچھے پوشیدہ مقاصد ہیں۔

حکمنامے میں کہا گیا کہ عدالت قانون کی بالادستی اور غیر جانبداری پر یقین رکھتی ہے، زیر سماعت کیسز کی سماعت معمول کے مطابق 30 اپریل کو ہوگی۔