پاکستان سے لوٹا ہوا پیسہ واپس لایا جائے تو ڈالر50 روپے کا ہوجائے گا، شعیب شاہین

پاکستان تحریکِ انصاف کے رہنما شعیب شاہین نے کہا ہے کہ پاکستان سے لوٹا ہوا پیسہ واپس لایا جائے تو ڈالر 50 روپے کا ہو جائےگا۔

شعیب شاہین نے اڈیالہ جیل کے باہر میڈیا سے گفتگو کے دوران کہا ہے کہ چیف جسٹس سے مطالبہ کیا ہے کہ بہاولنگر والے واقعہ پر سو موٹو ایکشن لیں، ہمارا مطالبہ ہے کہ 6 ججز والا معاملہ فل کورٹ کو بھیجا جائے۔

دوسری جانب بانیٔ پی ٹی آئی کے وکیل انتظار پنجوتھا نے بھی اڈیالہ جیل کے باہر میڈیا سے گفتگو کی۔

اُن کا کہنا تھا کہ میں بانیٔ پی ٹی آئی کا ترجمان ہوں، میرے داخلے پر پابندی عائد کر دی گئی، عدالت نے 22 اپریل سے قبل بشریٰ بی بی کا طبی معائنہ کرنے کی ہدایت کی ہے۔

انتظار پنجوتھا نے کہا کہ جہاں بانی پی ٹی آئی اور بشریٰ بی بی کو ریلیف ملتا ہے اس پرعمل درآمد نہیں کروایا جاتا۔

انتظار پنجوتھا کا مزید کہنا تھا کہ بانیٔ پی ٹی آئی کو پھر سز ادینے کی کوشش کی جا رہی ہے، اس پر ہائی کورٹ جائیں گے۔