پُرامید ہوں کہ سائفر کیس کل نمٹ جائے گا، بیرسٹر گوہر

22 مئی ، 2024

چیئرمین پاکستان تحریک انصاف (پی ٹی آئی) بیرسٹر گوہر خان نے کہا ہے کہ پُرامید ہوں کہ سائفر کیس کل نمٹ جائے گا۔

اسلام آباد ہائی کورٹ کے باہر میڈیا سے گفتگو میں بیرسٹر گوہر نے کہا کہ سائفر کیس کو آج ہی ختم ہونا چاہیے تھا، امید ہے کل مقدمہ نمٹ جائے گا۔

انہوں نے کہا کہ کل عدت میں نکاح کیس کی سماعت ہے، جس میں جج سے درخواست ہے کہ جلد نمٹادیں۔

پی ٹی آئی چیئرمین نے مزید کہا کہ الیکشن کمیشن کو کہا ہے کہ اپنے اختیار کا غلط استعمال نہ کریں، بانی پی ٹی آئی پر توشہ خانہ کا کوئی نیا کیس نہیں بن سکتا۔

ان کا کہنا تھا کہ ہم میں سے ہر کوئی پل کا کردار ادا کرنا چاہ رہا ہے۔ ہم تو سیز فائر چاہتے ہیں، ہمارے بچوں اور خواتین کو اٹھانے سے اب رہنماؤں کے گلے کاٹنے تک آگئے ہیں۔

بیرسٹر گوہر نے یہ بھی کہا کہ رؤف حسن پر حملے کی پُرزور مذمت کرتے ہیں، حکومت سے مطالبہ ہے کہ اس معاملے پر کارروائی کی جائے۔

انکا کہنا تھا کہ بانی پی ٹی آئی نے کہا ہے کہ رؤف حسن پر حملے کی ایف آئی آر میں دہشت گردی کی دفعات ہونا ضروری ہیں۔

پی ٹی آئی چیئرمین نے کہا کہ رؤف حسن پر حملےکےلیے مشترکہ تحقیقاتی ٹیم (جے آئی ٹی) بنائی جائے کیونکہ سب سے مقبول سیاسی جماعت کے رہنما پر حملہ ہوا ہے۔

بیرسٹر گوہر نے مزید کہا کہ رؤف حسن پر حملے کی تہہ تک جایا جائے کہ کس نے کیا اور کیوں کیا؟

قومی خبریں سے مزید