مریم نواز نے اپنی ہر کامیابی کس کے نام کی؟

وزیرِ اعلیٰ پنجاب مریم نواز نے کہا ہے کہ اپنی ہر کامیابی والد محمد نواز شریف کے نام کرتی ہوں جو ہر مشکل میں میرا حوصلہ ہیں۔

والد سے محبت کے عالمی دن پر جاری کیے گئے پیغام میں مریم نواز نے کہا ہے کہ خوش قسمت ہوں جو محمد نواز شریف جیسے والد گرامی ملے، ان کی بیٹی ہونے پر ناز ہے۔

انہوں نے کہا کہ ہر روز والدِ محترم سے دعائیں لے کر نکلتی ہوں، واپسی پر سب سے پہلے انہیں سلام کرتی ہوں۔

مریم نواز کا کہنا ہے کہ آج اپنے بچوں کی پرورش اور رہنمائی میں والد کا انمول کردار تسلیم کرنے کا دن ہے، والد کی خاموش قربانیوں کو تسلیم کرنا چاہیے جو اکثر نظر انداز کر دی جاتی ہیں۔

وزیرِ اعلیٰ پنجاب نے مزید کہا کہ بہتر مستقبل یقینی بنانے کے لیے باپ کی قربانیوں کو بھی تسلیم کیجیے، والد شجرِ سایہ دار ہے جو تپتی دھوپ میں بچوں کے لیے گھنا سایہ بن جاتا ہے۔

ان کا یہ بھی کہنا ہے کہ شفیق باپ سایہ دار شجر کی مانند ہے، جس کا کوئی نعم البدل نہیں، والدین کی عزت و تکریم کرنے والے، اف تک نہ کہنے والے دنیا و آخرت میں سرخرو ہوتے ہیں۔