ان کا لیڈر گرفتار ہوتا ہے تو 9 مئی واقعہ ہوتا ہے، زرداری گرفتار نہیں ہوئے؟ شرجیل میمن

وزیرِ ٹرانسپورٹ سندھ شرجیل انعام میمن نے کہا ہے کہ ان کا لیڈر گرفتار ہوتا ہے تو 9 مئی جیسے واقعات ہوتے ہیں، کیا صدر آصف علی زرداری، فریال تالپور گرفتار نہیں ہوئیں، زمان پارک میں پولیس پر پیٹرول بموں سے حملے کیے گئے۔

شرجیل انعام میمن نے کہا کہ  2018ء میں عوام کے مینڈٹ پر ڈاکا ڈالا گیا، یہ متنازع ترین الیکشن تھا، ایک مصنوعی شخص کو مصنوعی لیڈر بناکر پیش کیا گیا۔

انہوں نے مزید کہا کہ آپ کو دہشت گردی اور سیاست میں فرق کرنا ہوگا۔

شرجیل انعام میمن کا کہنا تھا کہ میں نے وعدہ کیا تھا کہ صبر کرو پی پی کی حکومت ہوگی۔

اُن کا کہنا تھا کہ کراچی کو ماضی میں کیا ملا سب کے سامنے ہے، کراچی میں مسائل اور چیلنجز موجود ہیں مگر کام ہو رہا ہے۔

شرجیل میمن نے کہا کہ بسوں کا جال کراچی میں بچھائیں گے، کراچی کی جو بھی خدمت ہے وہ صرف پی پی نے ہی کی ہے، میئر کراچی، وزیر اعلیٰ سندھ کراچی کی اصل خدمت کر رہے ہیں۔