بھارت: گرلز ہاسٹل کے واش روم میں خفیہ کیمرا، 300 ویڈیو برآمد

30 اگست ، 2024

بھارتی ریاست آندھرا پردیش کے ایک کالج کے گرلز ہاسٹل کے واش روم میں خفیہ کیمرے لگائے جانے کا انکشاف ہوا ہے۔

میڈیا رپورٹ کے مطابق آندھرا پردیش کے ایک انجینئرنگ کالج میں لڑکیوں کے ہاسٹل کے واش روم میں مبینہ طور پر ایک خفیہ کیمرہ سامنے آنے کے بعد طلباء نے شدید غم و غصہ کا اظہار کرتے ہوئے احتجاج کیا۔

ذرائع کی جانب سے دعویٰ کیا گیا کہ کیمرے سے خفیہ طور پر طالبات کی ویڈیوز بنائی گئیں، جو اسی کالج کے ایک سینئر طالب علم نے لیک اور فروخت کیں، جبکہ اس کے لیپ ٹاپ سے لڑکیوں کی 300 ویڈیوز بھی برآمد ہوئی ہیں۔

یہ واقعہ آندھرا پردیش کے ضلع کرشنا کے ایس آر گڈلاویلریو انجینئرنگ کالج میں لڑکیوں کے ہاسٹل میں پیش آیا۔ جس کے بعد طالبات نے انصاف اور تحفظ فراہم کرنے کے مطالبے کے ساتھ احتجاج کیا، جس پر انتظامیہ نے فوری طور پر کارروائی کا وعدہ کیا۔

پولیس اور مقامی حکام کی جانب سے واقعے کی تحقیقات کی جا رہی ہیں اور ملزمان کے خلاف سخت کارروائی کا امکان ہے۔

وزیر اعلیٰ آندھرا پردیش نے ہاسٹل میں خفیہ کیمروں کی موجودگی کے بارے میں طلباء کی تشویش پر تحقیقات کا حکم دے دیا۔

بین الاقوامی خبریں سے مزید