پی ٹی آئی جلسے کے شرکاء کا پولیس پر پتھراؤ، وزیر داخلہ نے رپورٹ طلب کرلی

پاکستان تحریک انصاف (پی ٹی آئی) جلسے کے شرکاء کے پولیس پر  پتھراؤ پر وزیر داخلہ محسن نقوی نے رپورٹ طلب کرلی۔

وفاقی وزیر داخلہ محسن نقوی نے آئی جی اسلام آباد پولیس سے رپورٹ طلب کی، وزیر داخلہ نے زخمی ایس ایس پی شعیب خان سے ٹیلیفونک رابطہ کرکے خیریت دریافت کی۔

محسن نقوی نے کہا کہ زخمی پولیس اہلکاروں کو علاج معالجے کی بہترین سہولتیں فراہم کی جائیں۔

کارکنوں کی جانب سے پولیس پر پتھراؤ کی خبریں من گھڑت ہیں، بیرسٹر سیف

بیرسٹر سیف نے کہا کہ پولیس اور انتظامیہ کی جانب سے پی ٹی آئی کارکنوں سے زیادتی کی جارہی ہے، انتظامیہ کارکنوں کو جلسہ گاہ نہیں جانے دے رہی ہے۔

یاد رہے کہ وفاقی دارالحکومت اسلام آباد میں پاکستان تحریک انصاف (پی ٹی آئی) جلسے کے شرکاء کی جانب سے پولیس پر پتھراؤ کیا گیا، پولیس نے جوابی شیلنگ بھی کی۔

اسلام آباد میں 26 نمبر چُنگی پر جلسے کے شرکاء نے جاری کردہ روٹ کی خلاف ورزی کرتے ہوئے پولیس پر پتھراؤ کیا ہے۔

ترجمان اسلام آباد پولیس کا کہنا ہے کہ روٹ کی خلاف ورزی کرکے آنے والے شرکاء نے پولیس پرشدید پتھراؤ کیا، جس سے ایس ایس پی سیف سٹی اور متعدد پولیس اہلکار زخمی ہوگئے۔