عمران ہاشمی کی پاکستان آمد کے سوال پر حمائمہ ملک نے کیا کہا؟

پاکستان شوبز انڈسٹری کی معروف اداکارہ حمائمہ ملک نے بتا دیا کہ وہ بھارتی اداکار عمران ہاشمی کی پاکستان آمد پر ان کا استقبال کس طرح کریں گی۔

حال ہی میں حمائمہ ملک نےاپنے بھائی و اداکار فیروز خان کے ہمراہ بھارتی صحافی فریدون شہریار کو آن لائن انٹرویو دیا، جس کے مختصر ویڈیو کلپس سوشل میڈیا پر وائرل ہو رہے ہیں۔

دورانِ انٹرویو اداکارہ نے ایک سوال کا جواب دیتے ہوئے سنجے لیلیٰ بھنسالی کے ساتھ کام کرنے کی خواہش کا اظہار کیا۔

اسی انٹرویو میں جب صحافی نے سوال کیا کہ اگر عمران ہاشمی پاکستان آئیں تو آپ کیا کریں گی؟

اس کے ساتھ ہی صحافی نے 2 فرضی آپشنز بھی دیے کہ ان کو ایئر پورٹ سے برقعہ پہنا کر لائیں گی تاکہ وہ لڑکیوں سے محفوظ رہیں یا پھر تمام خواتین کو گھروں میں رہنے کا کہیں گی؟

صحافی کے آپشنز سن کر اداکارہ نے انہیں رد کرتے ہوئے کہا کہ میں تو تمام لڑکیوں کو بتا دوں گی کہ عمران ہاشمی آ رہے ہیں آپ لوگ ایئر پورٹ چلے جائیں تو وہ توجہ حاصل کر کے خوش ہو جائیں گے۔

حمائمہ ملک کے مطابق برقعہ پہنا کر ایئر پورٹ سے لانے کے آپشن پر غور کیا جا سکتا ہے یہ انہیں (عمران ہاشمی کو) پسند آئے گا لیکن عمران ہاشمی کو اپنا اسٹار ڈم بہت پسند ہے، انہیں اچھا لگتا ہے جب لوگ ان کے گرد جمع ہوتے ہیں۔

اداکارہ نے یہ بھی کہا کہ اگر کبھی عمران ہاشمی میرے ساتھ پوڈ کاسٹ میں آئے تو ان سے پوچھوں گی کہ وہ اتنا اپنے آپ میں کیوں رہتے ہیں؟

خیال رہے کہ حمائمہ ملک اور عمران ہاشمی نے 2014ء میں ریلیز ہونے والی فلم ’راجہ نٹور لال‘میں مرکزی کردار بھی ادا کیا تھا، جس کے بعد سے ان کی جوڑی کو بے حد پسند کیا جاتا ہے۔