وزیرِ اعظم کا پوزیشن ہولڈر اسکول طلباء میں الیکٹرک بائیکس کی تقسیم کا فیصلہ

وزیرِ اعظم شہباز شریف نے الیکٹرک وہیکلز سے متعلق جامع فنانشل ماڈل پیش کرنے کی ہدایت کر دی۔

وزیرِ اعظم کی زیرِ صدارت الیکٹرک وہیکلز کے استعمال سے متعلق اجلاس ہوا جس میں شہباز شریف نے وفاقی وزارتِ خزانہ اور اسٹیٹ بینک سے مشاورت کی ہدایت کر دی۔

شہباز شریف نے نیشنل الیکٹرک وہیکلز پالیسی نومبر میں مکمل کرنے اور ملک میں ای وہیکلز کی تیاری سے متعلق لائسنسز کے ضابطہ کار کو بہتر بنانے کی ہدایت کر دی۔

اس موقع پر گفتگو کرتے ہوئے وزیرِ اعظم شہباز شریف نے کہا ہے کہ ملک میں بجلی سے چلنے والی گاڑیوں کے فروغ کے لیے حکومت ترجیحی اقدامات کر رہی ہے۔

انہوں نے کہا کہ بجلی سے چلنے والی گاڑیوں سے پیٹرول اور ڈیزل کی درآمد کی مد میں زرِ مبادلہ کی بچت ہو گی اور گاڑیاں ماحول دوست بھی ہوں گی۔

الیکٹرک گاڑیوں کے بارے میں آپ کیا جانتے ہیں؟

اگر آپ کو لگتا ہے کہ الیکٹرک کاریں ایک نیا تصور...

شہباز شریف کا کہنا ہے کہ ای وہیکلز کی پالیسی سے متعلق تمام صوبوں، وفاقی اکائیوں اور اسٹیک ہولڈرز سے مشاورت کی جائے، سرکاری اسکولوں کے اچھی کارکردگی دکھانے والے طلباء میں الیکٹرک بائیکس تقسیم کی جائیں گی۔

وزیرِ اعظم کا کہنا ہے کہ آئندہ تمام وفاقی سرکاری اداروں صرف الیکٹرک بائیکس کی خریداری کی جائے گی۔

وزیرِ اعظم نے تمام وفاقی وزارتوں کو ہدایت جاری کرنے کے احکامات جاری کرتے ہوئے سی ڈی اے کو اسلام آباد میں الیکٹرک ٹرانسپورٹ سے متعلق پلان دینے کی ہدایت کر دی۔