آل پارٹیز کانفرنس: آزاد فلسطینی ریاست کے قیام اور اقوام متحدہ کی رکنیت کا مطالبہ

مظلوم فلسطینیوں سے اظہار یکجہتی کے لیے آل پارٹیز کانفرنس کا انعقاد ہوا جہاں قومی قیادت نے آزاد فلسطینی ریاست کے قیام اور اقوام متحدہ کی رکنیت کا مطالبہ کیا۔ 

غزہ پر اسرائیلی جارحیت کا ایک سال مکمل ہونے اور غزہ و فلسطین کے معاملے پر ایوانِ صدر میں صدرِ مملکت آصف علی زرداری کی زیرِ صدارت آل پارٹیز کانفرنس کا انعقاد ہوا۔

آل پارٹیز کانفرنس میں وزیرِ اعظم شہباز شریف، سابق وزیراعظم نواز شریف، چیئرمین پیپلز پارٹی بلاول بھٹو زرداری، سربراہ جے یو آئی (ف) مولانا فضل الرحمان سمیت اور ملک کی دیگر سیاسی قیادت بھی شریک ہوئی۔

اس سلسلے میں نائب وزیراعظم اسحاق ڈار نے مشترکہ قرارداد پیش کی جس میں اسرائیل کے نسل کشی پر مبنی اقدامات کی سخت مذمت کی گئی اور کہا گیا کہ پاکستان غزہ میں انسانی امداد پہنچانے کی کوششوں کو دگنا کرے گا۔

اسرائیل کی انسانی حقوق کی خلاف ورزیوں کا معاملہ ہر فورم پر اٹھاتے رہیں گے، صدر مملکت

صدر مملکت آصف علی زرداری نے اپنے خطاب میں کہا کہ یاسر عرفات یہاں آتے جاتے رہے، بینظیر بھٹو کے ساتھ میں ان سے ملتا رہا۔

انہوں نے مزید کہا کہ ایک سال پہلے اسرائیل نے غزہ اور فلسطین پر جارحیت کی، اسرائیل کے اقدامات دنیا کو خطرے میں ڈال رہے ہیں۔ اسرائیل فلسطین کے علاوہ لبنان پر بھی جارحیت کر رہا ہے۔

صدر مملکت کا کہنا تھا کہ اسرائیل فلسطینیوں کی نسل کشی کر رہا ہے، اسرائیلی جارحیت کے باعث 41 ہزار فلسطینی شہید ہوچکے ہیں۔ فلسطین اور غزہ میں صحت اور تعلیم کا ڈھانچہ مکمل تباہ ہوچکا ہے۔

صدر آصف علی زرداری نے کہا کہ ہم اقوام عالم سے مطالبہ کرتے ہیں کہ وہ اسرائیل کو جارحیت سے روکے۔ ہم اسرائیل کی انسانی حقوق کی خلاف ورزیوں کا معاملہ ہر فورم پر اٹھاتے رہیں گے، ہم اقوام متحدہ کی سلامتی کونسل سے مطالبہ کرتے ہیں کہ اسرائیل کو جارحیت سے روکے۔

انکا کہنا تھا کہ اسرائیل تمام قبضہ کیے گئے عرب علاقوں سے واپس جائے، عالمی برادری فلسطینیوں کی نسل کشی روکنے میں ناکام ہوئی ہے۔

قرارداد پاکستان کے تناظرمیں ہم اسرائیل کو آزاد ریاست تسلیم نہیں کرتے، حافظ نعیم

انکا کہنا تھا کہ قرارداد پاکستان کے تناظرمیں ہم اسرائیل کو آزاد ریاست تسلیم نہیں کرتے۔ قائداعظم نے 1940 میں اسرائیل کو ناجائز ریاست قرار دیا تھا، پاکستان نے کبھی بھی اسرائیل کے وجود کوتسلیم نہیں کیا۔

انکا یہ بھی کہنا کہ ہماری واضح پوزیشن ہے کہ اسرائیل ایک ناجائز اور قابض ریاست ہے، قائداعظم نے کہا تھا پاکستان اسرائیل کو کبھی تسلیم نہیں کرے گا۔

ہمیں آج عملی اقدامات کا اعلان کرنا چاہیے، خالد مقبول صدیقی

سربراہ ایم کیو ایم پاکستان ڈاکٹر خالد مقبول صدیقی نے اپنے خطاب میں کہا کہ ہم نے سیاسی طور پر مظاہرے کیے ہیں، لیکن مزید آگے بڑھ کر بات کرنے کی ضرورت ہے۔

انکا کہنا تھا کہ مجھے لگتا ہے کہ آگے بڑھ کر سفارتی طور پر آواز اٹھانے کی ضرورت ہے، پاکستان کا پیغام تمام اسلامی ممالک تک پہنچائیں۔

انہوں نے کہا کہ وزیراعظم اعلان کریں کہ پاکستان کی تمام جامعات میں فلسطین کے بچوں کو اسپانسر کریں، آج کوئی عملی اقدامات کا اعلان کیا جائے۔

انکا کہنا تھا کہ مذمت ہم کرچکے، مرمت ہم کر نہیں سکتے، ہمیں آج عملی اقدامات کا اعلان کرنا چاہیے۔

فلسطینی نقصان میں نہیں بلکہ کامیاب ہورہے ہیں، خالد مگسی

آل پارٹیز کانفرنس سے خطاب میں خالد مگسی نے کہا کہ ہمارے چیخنے سے اسرائیل کو کوئی فرق نہیں پڑے گا۔ اللّٰہ کے آگے ہم قیامت کے دن کس منہ سے کھڑے ہوں گے؟ ہم سب کو اپنے گریبان میں جھانکنا چاہیے۔

خالد مگسی کا کہنا تھا کہ فلسطین کے لوگ نقصان میں نہیں، وہ کامیاب ہو رہے ہیں۔

حقائق دیکھ کر ہمیں کوئی حکمت عملی طے کرنی چاہیے، چوہدری سالک حسین

مسلم لیگ (ق) کے رہنما چوہدری سالک حسین نے کہا کہ وزیراعظم نے جو یو این میں تقریر کی اس کا بھی بہت اثر ہوا۔

انکا کہنا تھا کہ ہمیں یہاں کھل کر بات کرنی چاہیے، فلسطین میں بچے شہید ہو رہے ہیں، مسئلہ فلسطین کے حل کی طرف ہمیں سوچنا چاہیے۔

انکا کہنا تھا کہ کسی بھی جنگ میں اتنی خواتین اور بچے شہید نہیں ہوئے۔ حقائق دیکھ کر ہمیں اس متعلق کوئی حکمت عملی طے کرنی چاہیے۔

فلسطین کےلیے ہم نے واقعی کچھ نہیں کیا، عبدالعلیم خان

استحکام پاکستان پارٹی کے رہنما عبدالعلیم خان نے کہا کہ اسرائیلی بربریت کو ایک سال ہوچکا ہے۔ فلسطین کےلیے ہم نے واقعی کچھ نہیں کیا، ہم جو کرسکتے تھے وہ بھی نہیں کیا۔

انکا کہنا تھا کہ یو این کے اجلاس کے دوران بھی فلسطینی بچوں کا قتل عام جاری تھا۔ دنیا بےحس ہوچکی ہے۔ ہم بہت ساری چیزوں میں بٹے ہوئے ہیں۔

انہوں نے کہا کہ ان ممالک کے پاس کچھ نہیں بچا جو آپس میں ٹوٹ گئے تھے، آج ان ممالک کو دیکھیں جہاں فتنا فساد تھا۔

عبدالعلیم خان کا کہنا تھا کہ جہاں جہاں اسرائیل نے حملہ کیا وہ ممالک معاشی طور پر مستحکم نہیں تھے، بٹے ہوئے تھے۔ سیاست ضرور کریں لیکن ملک کو پہلے رکھیں۔

سوچنا چاہیے کہ فلسطینیوں پر جو ظلم ہو رہا ہے، اسے ختم کیسے کریں؟، ایمل ولی خان

عوامی نیشنل پارٹی کے رہنما ایمل ولی خان نے کہا کہ سوچنا چاہیے کہ فلسطینیوں پر جو ظلم ہو رہا ہے، اسے ختم کیسے کریں؟

انکا کہنا تھا کہ فلسطین کے ساتھ ہم کشمیر کی آزادی کی بھی بات کریں گے۔ افغانستان بھی مظلوم ملک ہے۔

انہوں نے کہا کہ کشمیریوں کو انکی مرضی کے فیصلے کرنے دیں، اپنے ملک پر بھی ہم کو نظر ڈالنی چاہیے۔

ایمل ولی کا کہنا تھا کہ جو رونا ہم فلسطین کےلیے رو رہے ہیں ایسا نہ ہو کہ اگلے 50 سال میں بلوچستان اور کےپی کےلیے رو رہے ہوں۔

غزہ میں فوری جنگ بندی اور جارحیت کے خاتمے کا مطالبہ، اعلامیہ 

اس حوالے سے جاری اعلامیہ میں کہا گیا کہ فلسطین میں جاری اسرائیلی جارحیت کی بھرپور مذمت کرتے ہیں جبکہ غزہ میں فوری جنگ بندی اور جارحیت کے خاتمے کا مطالبہ کرتے ہیں۔

اعلامیہ یہ بھی کہا تھا کہ اسرائیل فلسطینیوں کی نسل کشی اور جنگی جرائم کا مرتکب ہو رہا ہے۔ فلسطین میں جاری اسرائیلی جارحیت کی بھرپور مذمت کرتے ہیں۔

اے پی سی اعلامیہ میں کہا گیا کہ او آئی سی، عرب لیگ اور دیگر عالمی اداروں کی طرف سے امن و استحکام کےلیے سیاسی و سفارتی کوششوں کی حمایت کرتے ہیں۔

اس میں کہا گیا کہ اسرائیل عالمی قوانین کی دھجیاں بکھیر رہا ہے۔ فلسطین کے عوام کو آزادی کے حصول کےلیے اپنی غیرمتزلزل حمایت کا یقین دلاتے ہیں۔

اعلامیہ میں مزید کہا گیا کہ پاکستان نے فلسطین اور لبنان کے بھائیوں کیلئے امدادی سامان بھجوایا ہے۔

پی ٹی آئی کی اے پی سی میں شرکت سے معذرت

خیال رہے کہ پاکستان تحریک انصاف (پی ٹی آئی) نے اس اے پی سی میں شرکت سے معذرت کی ہے۔

پی ٹی آئی کا فلسطین پر حکومتی اے پی سی میں شرکت نہ کرنے کا فیصلہ

پاکستان تحریکِ انصاف (پی ٹی آئی) نے فلسطین پر وفاقی حکومت کی آل پارٹیز کانفرنس میں شرکت نہ کرنے کا فیصلہ کر لیا۔

چیئرمین پی ٹی آئی بیرسٹر گوہر علی نے ’جیو نیوز‘ سے گفتگو کرتے ہوئے کہا ہے کہ موجودہ حالات میں پارٹی رہنما اور کارکن گرفتار ہیں۔

انہوں نے کہا کہ گرفتاریوں کے حالات میں اے پی سی میں شرکت نہ کرنے کا فیصلہ کیا ہے۔

بیرسٹر گوہر کا کہنا تھا کہ تحریکِ انصاف کو فلسطین پر اے پی سی میں شرکت کی دعوت مل گئی ہے۔