فرمان الہی
نماز کے اوقات
پارہ چنار واقعے کے خلاف مجلسِ وحدتِ مسلمین کے احتجاج کا کراچی کے مزید علاقوں میں بھی دائرہ وسیع ہو گیا ہے۔
احتجاج کے باعث سڑکیں ٹریفک کے لیے بند ہیں اور شہریوں کو مشکلات کا سامنا کرنا پڑ رہا ہے۔
کراچی کے 10 سے زائد مقامات پر مذہبی جماعت کا دھرنا جاری ہے جس کی وجہ سے ٹریفک معطل ہے۔
گلستانِ جوہر کامران چورنگی پر دھرنا جاری ہے جس کی وجہ سے ٹریفک کو موسمیات سے یونیورسٹی روڈ کی طرف بھیجا جا رہا ہے۔
سرجانی ٹاؤن میں شمس الدین عظیمی روڈ پر، نواب صادق خان روڈ ناظم آباد نمبر ایک پر بھی دھرنا جاری ہے۔
ٹریفک پولیس کے مطابق ناظم آباد 2 نمبر جانے والے ٹریفک کو لسبیلہ سے تین ہٹی بھیجا جا رہا ہے۔
اس کے علاوہ شاہراہِ پاکستان پر انچولی کے مقام پر بھی دھرنا ہو رہا ہے۔
علاوہ ازیں شارعِ فیصل اسٹارگیٹ کے قریب بھی مذہبی جماعت کا دھرنا جاری ہے جس کے باعث کارساز سے ڈرگ روڈ کے دونوں روڈ پر ٹریفک کا دباؤ ہے۔
مین نیشنل ہائی وے ٹاؤن شپ کے سامنے بھی دھرنا ہو رہا ہے، ٹھٹہ سے آنے اور جانے والے ٹریفک کو لنک روڈ سے پورٹ قاسم کی طرف بھیجا جا رہا ہے۔
دوسری جانب ایم اے جناح روڈ نمائش چورنگ پر بھی دھرنا جاری ہے، ابوالحسن اصفہانی روڈ عباس ٹاؤن اور یونیورسٹی روڈ پر سفاری پارک کے قریب، نارتھ ناظم آباد میں فائیو اسٹار چورنگی پر بھی دھرنا ہو رہا ہے۔
نیشنل ہائی وے ملیر 15 برج کے قریب بھی مذہبی جماعت کا دھرنا جاری ہے اور ٹریفک کو ملیر ہالٹ سے ماڈل کالونی اور منزل پمپ سے یونس چورنگی بھیجا جا رہا ہے۔
