فرمان الہی
نماز کے اوقات
اسلامی تعاون تنظیم (او آئی سی) کی سائنسی اور تکنیکی تعاون کی مستقل کمیٹی (کامسٹیک) اور بنگلا دیش کے درمیان اعلیٰ سطحی تعلیمی اور تحقیقی تعاون کا اجلاس ڈھاکا میں منعقد ہوا۔
اجلاس کی میزبانی او آئی سی- کامسٹیک کے کوآرڈینیٹر جنرل پروفیسر ڈاکٹر محمد اقبال چوہدری نے کی، جس کا مقصد تعلیم اور تحقیق کے شعبے میں کامسٹیک اور بنگلا دیش کے درمیان تعاون کو فروغ دینا ہے۔
اجلاس کا بنیادی مقصد اعلیٰ تعلیم اور تحقیق میں تعاون کو مضبوط بنانا ہے۔
اجلاس میں تعلیمی تبادلہ پروگرام، مشترکہ تحقیقی منصوبے، فیکلٹی تربیتی پروگرام اور استعداد کار بڑھانے کے منصوبے شامل تھے۔
یونیورسٹی گرانٹ کمیشن کے چیئرمین نے ڈاکٹر اقبال چوہدری سے درخواست کی کہ وہ بین الاقوامی درجہ بندی میں بنگلا دیشی جامعات کی بہتری کے لیے مدد فراہم کریں، جس پر ڈاکٹر چوہدری نے کامسٹیک کی جانب سے مکمل تعاون کی یقین دہانی کرائی اور تجویز دی کہ کامسٹیک کے تعاون سے متعلقہ ماہرین کا ایک وفد بنگلا دیش کا دورہ کرے گا۔
دورے کے دوران یو جی سی کی جانب سے مختلف جامعات میں سیمینارز کا انعقاد کیا جائے گا، جن میں تعلیمی درجہ بندی کو بہتر بنانے کے لیے تجربات اور بہترین طریقے شیئر کیے جائیں گے۔
ڈاکٹر اقبال چوہدری نے چئیرمین یونیورسٹی گرانٹ کمیشن کے ساتھ ’3U1M‘ ماڈل بھی متعارف کرایا، یہ ماڈل 3 سال کی سخت تعلیمی تربیت اور مہارتوں کے فروغ پر مشتمل ہے، چوتھے سال میں طلبہ کو صنعتی اداروں میں کام کرنے کا موقع دیا جاتا ہے تاکہ وہ حقیقی مسائل کو سمجھ کر ان کے عملی حل تلاش کریں۔
یہ ماڈل تعلیمی اداروں اور انڈسٹری کے درمیان خلاء کو کم کرنے میں مدد دے گا اور طلبہ کو ایسی مہارت فراہم کرے گا جو جدید دور کی ملازمتوں کے لیے ضروری ہیں۔
ڈاکٹر اقبال چوہدری نے بنگلا دیش کی اعلیٰ تعلیمی قیادت کو کامسٹیک ہیڈکوارٹر اور پاکستان کی اعلیٰ جامعات کے دورے کی دعوت دی تاکہ تعلیمی اور تحقیقی تعاون کو فروغ دیا جا سکے، معلومات کے تبادلے اور مشترکہ منصوبوں پر کام کیا جا سکے اور او آئی سی کے رکن ممالک کے درمیان مضبوط تعلقات استوار کیے جا سکیں۔
اجلاس میں بنگلا دیش کے اہم تعلیمی رہنماؤں نے شرکت کی، جن میں پروفیسر ڈاکٹر ایس ایم اے فائز، چیئرمین یونیورسٹی گرانٹس کمیشن آف بنگلا دیش (یو جی سی) اور 2 دیگر اعلیٰ حکام شامل تھے۔
اجلاس میں ڈھاکا یونیورسٹی، بنگلا دیش یونیورسٹی آف انجینئرنگ اینڈ ٹیکنالوجی (بی یو ای ٹی)، بنگلا دیش اوپن یونیورسٹی، نارتھ ساؤتھ یونیورسٹی (این ایس یو)، ڈیفوڈل انٹرنیشنل یونیورسٹی سمیت اسلامک عربک یونیورسٹی کے وائس چانسلرز، ایسوسی ایشن آف پرائیویٹ یونیورسٹیز آف بنگلا دیش کے چیئرمین نے بھی شرکت کی۔
