فرمان الہی
نماز کے اوقات
سابق بھارتی کرکٹر روی شاستری کا کہنا ہے کہ ہوم کنڈیشنز میں پاکستان ایک خطرناک ٹیم ہے۔
سابق آسٹریلوی کپتان رکی پونٹنگ اور سابق بھارتی کرکٹر روی شاستری نے چیمپئنز ٹرافی میں پاکستان ٹیم کے حوالے سے آئی سی سی ریویو میں اظہارِ خیال کیا۔
روی شاستری نے کہا کہ جب بھی آپ اس خطے میں ہوم گراؤنڈ پر کھیلتے ہیں تو دباؤ رہتا ہے، چاہے یہ ٹیمیں بھارت، سری لنکا، بنگلا دیش یا پاکستان کی ہوں۔
انہوں نے کہا کہ میرے خیال میں پاکستان نے گزشتہ 6 سے 8 مہینوں میں بڑی اچھی پرفارمنسز کا مظاہرہ کیا ہے، خاص کر پاکستان ٹیم کی جنوبی افریقا میں کارکردگی اچھی رہی ہے۔
سابق بھارتی کپتان کا کہنا ہے کہ پاکستان نے صائم ایوب کو ٹاپ آرڈر میں مس کیا ہے، صائم ایوب بڑے اہم کھلاڑی ہیں، پاکستان ٹیم کو سیمی فائنل کے لیے کوالیفائی کرنا چاہیے، وہاں ہر کسی کا اپنا کھیل ہو گا۔
روی شاستری نے یہ بھی کہا کہ اگر پاکستان ٹیم ناک آؤٹ مرحلے میں پہنچتی ہے تو وہ کسی بھی ٹیم کے لیے خطرناک ثابت ہو گی، پاکستان ٹیم ناک آؤٹ مرحلے میں دگنی خطرناک ثابت ہو سکتی ہے۔
آسٹریلیا کے سابق کپتان رکی پونٹنگ نے کہا کہ روی شاستری کی رائے سے متفق ہوں، صائم ایوب ایک کوالٹی پلیئر ہیں، ان کی کمی کو پورا کرنا مشکل ہو گا۔
انہوں نے کہا کہ پاکستان کی بولنگ بہت بہت اچھی ہے، شاہین آفریدی اور نسیم شاہ حالیہ سیریز میں بڑے شاندار رہے ہیں، دونوں بولرز کسی بھی بیٹنگ لائن اپ کو پریشان کرنے کی مہارت رکھتے ہیں۔
رکی پونٹنگ کا کہنا ہے کہ حالیہ سالوں میں بابر اعظم کی بیٹنگ میں نشیب و فراز آئے ہیں، وہ اور رضوان دونوں بہترین کارکردگی کا مظاہرہ کرتے ہیں تو پاکستان ایک خطرناک ٹیم بن جائے گی۔
سابق آسٹریلوی کرکٹر نے یہ بھی کہا کہ ہوم گراؤنڈ پر کھیلنے سے تماشائیوں کی وجہ سے آپ متحرک رہتے ہیں، کراؤڈ کی سپورٹ آپ کو بڑے مواقع پر کھیلنے میں مدد دیتی ہے، پاکستان ٹیم میں متعدد کوالٹی پلیئرز ہیں جو کسی بھی ٹیم کو کسی بھی دن ہرا سکتے ہیں۔
