فرمان الہی
نماز کے اوقات
اسلام آباد ہائی کورٹ نے بانیٔ پی ٹی آئی عمران خان کے سابق چیف سیکیورٹی افسر کا نام پاسپورٹ کنٹرول لسٹ سے نکالنے کا حکم دے دیا۔
جسٹس محمد آصف نے درخواست پر سماعت کے دوران پٹیشنر کا نام سفری پابندیوں کی فہرست سے نکالنے کا حکم دیتے ہوئے اپنے ریمارکس میں کہا ہے کہ عمر سلطان کا نام پی سی ایل میں شامل کرنا بلا جواز اور غیر قانونی ہے۔
عدالت نے کہا کہ وفاقی حکومت کی منظوری سے سفری پابندیوں کی فہرست میں نام شامل کیا گیا، نام شامل کر کے آئین میں درج بنیادی حقوق کی خلاف ورزی کی گئی، ایف آئی اے کی رپورٹ کے مطابق پٹیشنر کا نام پی سی ایل، ای سی ایل میں ایکٹیو ہے۔
عدالت نے کہا ہے کہ درخواست گزار کا نام ڈائریکٹوریٹ جنرل آف امیگریشن اینڈ پاسپورٹس نے اے آئی جی کی سفارش پر شامل کیا، متعدد ایف آئی آرز کی وجہ سے نام لسٹ میں شامل کرنے کی سفارش کی گئی، 24 اگست 2023ء کو نام سفری پابندیوں کی لسٹ میں شامل کرنے کی سفارش کی گئی، انسدادِ دہشت گردی کی عدالت 18اپریل 2024ء کو درخواست گزار کی ضمانت منظور کر چکی ہے۔
اسلام آباد ہائی کورٹ نے فریقین کو درخواست گزار کانام سفری پابندیوں کی فہرست سے فوری نکالنے کا حکم دے دیا۔
