فرمان الہی
نماز کے اوقات
وزیراعظم کے مشیر برائے سیاسی امور رانا ثناء اللّٰہ نے کہا ہے کہ پی ٹی آئی بار بار چڑھائی کرتی ہے، پرویز خٹک اس سے نمٹ سکتے ہیں۔
جیو نیوز کے پروگرام "آج شاہ زیب خانزادہ کے ساتھ" گفتگو میں رانا ثناء اللّٰہ نے کہا کہ پرویز خٹک کے پی کے بھاری بھر کم اور موثر شخصیت ہیں، کے پی حکومت آئے دن اسلام آباد پر چڑھائی کی تیاری کرتی ہے، میرا خیال ہے کہ کے پی میں پرویز خٹک موثر کردار ادا کرسکتے ہیں۔
رانا ثناء نے کہا کہ سننے میں آ رہا ہے کہ عید کے بعد دوبارہ سے ان کا پروگرام بن رہا ہے، بجائے کام کرنے کے انھوں نے پورا زور اسلام آباد چڑھائی پر لگایا ہوا ہے، کے پی کے حوالے سے پرویز خٹک کے لانے کے مثبت اثرات ہوسکتے ہیں، پرویز خٹک کے لانے میں وہ سوچ بھی ہوسکتی ہے جس کی وجہ سے سوال ہو رہے ہیں۔
انہوں نے کہا کہ ہمیشہ کہا ہے کہ یہ اتحادی حکومت ہے کبھی ن لیگی حکومت کا دعویٰ نہیں کیا، پیپلز پارٹی ہر مشاورت میں شامل ہوتی ہے، وزیراعظم شہباز شریف نے سو دن بعد کابینہ میں اضافے کا عندیہ دیا تھا۔
رانا ثناء اللّٰہ نے امریکی صدر کے پاکستان کے بارے میں بیان پر بات کرتے ہوئے کہا کہ ٹرمپ سے متعلق جو کہا جا رہا تھا کہ یہ ہوجائے گا وہ ہوگا ایسا کچھ نہیں ہونا تھا، امریکی صدر ٹرمپ کا کچھ پتا نہیں چلتا کل کوئی اور بات کریں۔
انہوں نے یہ بھی کہا کہ حکومت کے اعتماد کی وجہ معیشت کی بہتری ہے،
اڈیالا جیل میں موجود شخص کے ساتھ معاملہ فہمی کرنا آسان کام نہیں۔
خیال رہے کہ پاکستان تحریک انصاف دور کے وزیر دفاع پرویز خٹک کو شہباز شریف کا مشیر داخلہ مقرر کردیا گیا، نئے کابینہ ارکان کو وزارتوں کےقلمدان سونپ دیے گئے۔
طارق فضل چوہدری پارلیمانی امور، حنیف عباسی ریلوے، علی وزیر ملک پیٹرولیم، مصطفیٰ کمال کو صحت کی وزارت مل گئی۔
چوہدری سالک حسین کی جگہ سردار محمد یوسف کو مذہبی امور کی وزارت کا قلمدان سونپ دیا گیا۔
