فرمان الہی
نماز کے اوقات
پاکستانی معروف اداکار عمران عباس نے عید کے پُر مسرت موقع پر اس دن کی مبارک باد دیتے ہوئے مداحوں کے نام اہم پیغام بھی شیئر کر دیا۔
فوٹو اینڈ ویڈیو شیئرنگ پلیٹ فارم انسٹاگرام پر اداکار نے عید کے موقع پر ویڈیو پیغام جاری کیا ہے۔
سوشل میڈیا پر شیئر کیے گئے ویڈیو پیغام میں اداکار نے عید کے موقع پر فضول خرچی اور بے جا اسراف سے باز رہنے کا پیغام دیا ہے۔
انہوں نے ویڈیو پیغام میں کہا ہے کہ یہ کُرتا جو اِس وقت میں نے پہنا ہوا ہے، یہ آج سے 14 سال پہلے میں نے اپنے ہم ٹی وی کی سیریل ’میرا نصیب‘ میں پہنا تھا جو میرے بہت ہی پیارے دوست عبدالصمد نے ڈیزائن کیا تھا۔
اداکار کے مطابق یہ اس لیے بتایا ہے کیونکہ عید پر دنیا بھر میں ہمارے بہت سے بہن بھائی ایسے بھی ہیں جو عید پر نئی کپڑے خریدنے کی استطاعت نہیں رکھتے، وہ دل چھوٹا مت کریں، جس طرح میں نے آج اپنے 14 سال پرانے کپڑے دوبارہ پہنے ہیں، اس طرح ہم میں سے کوئی بھی یہ کر سکتا ہے۔
عمران عباس نے کہا کہ ہم ہر ایونٹ، ہر شادی، ہر تقریب، ہر عید، ہر تہوار کے لیے نئے کپڑے بناتے ہیں لیکن ہم بھول جاتے ہیں کہ ہمارے بہت سارے بہن بھائی ایسے ہیں جو نئے کپڑے خریدنے کی استطاعت نہیں رکھتے۔
انہوں نے اپنے مداحوں کو ترغیب دیتے ہوئے کہا کہ آئیے! ایک ٹرینڈ سیٹ کرتے ہیں کہ اگر ہم پُرانے کپڑے پہن لیں تو کوئی معیوب بات نہیں، اس عید پر اپنے تمام بہن بھائیوں کو یاد رکھیے، جو ہماری طرح عید نہیں منا سکتے۔
انہوں نے عید کی مبارک باد پیش کرتے ہوئے مزید کہا کہ عید منائیے خوشیوں کے ساتھ، اپنوں کے ساتھ، آپ جہاں بھی ہیں، آپ کو میری طرف سے بہت بہت عید مبارک۔
سوشل میڈیا صارفین اداکار کے اس اقدام کو خوب سراہ رہے ہیں۔
