فرمان الہی
نماز کے اوقات
ممبئی میں بالی ووڈ کے لیجنڈری اداکار منوج کمار کی آخری رسومات کے موقع پر معروف اداکار ابھیشیک بچن نے پاپارازی کے رویے پر شدید ناراضی کا اظہار کیا۔
سوشل میڈیا پر وائرل ویڈیو میں دیکھا جا سکتا ہے کہ ابھیشیک بچن میڈیا کے ایک رکن پر غصے سے ہاتھ اٹھاتے ہیں اور کیمرہ ہٹاتے ہیں۔
منوج کمار کی آخری رسومات 5 اپریل کو ممبئی کے پون ہنس شمشان گھاٹ میں انجام دی گئیں جہاں امیتابھ بچن اور ابھیشیک بچن سمیت متعدد فلمی شخصیات نے شرکت کی۔
امیتابھ بچن جہاں سلیم خان سے خوش دلی سے ملاقات کر رہے تھے، وہیں پیچھے چلتے ہوئے ابھیشیک پاپارازی کے مسلسل فوٹو لینے پر مشتعل ہو گئے۔
ویڈیو میں دیکھا جا سکتا ہے کہ وہ ایک فوٹوگرافر کا ہاتھ پیچھے دھکیلتے ہیں اور پھر میڈیا کے ایک فرد سے کچھ سخت جملوں کا تبادلہ کرتے ہیں، جس کے بعد وہ کار میں سوار ہو کر روانہ ہو جاتے ہیں۔
ویڈیو میں ایک اور دلچسپ لمحہ اس وقت سامنے آیا جب امیتابھ بچن نے سلیم خان سے مصافحہ کیا اور ان کے ساتھ مختصر گفتگو کے بعد گلے ملے۔ بعد ازاں ابھیشیک بچن نے بھی سلیم خان کو گرمجوشی سے گلے لگایا۔ اس موقع پر دونوں باپ بیٹا سفید کُرتا پاجامہ اور سیاہ جیکٹ پہنے نظر آئے۔
87 سالہ منوج کمار کا انتقال 4 اپریل کو ممبئی کے کوکیلا بین دھیروبھائی امبانی اسپتال میں عمر رسیدگی کے باعث ہوا۔
ان کی آخری رسومات سرکاری اعزاز کے ساتھ ادا کی گئیں، جن میں تین توپوں کی سلامی بھی شامل تھی۔
جنازے میں زید خان، پریم چوپڑا، رضا مراد، ارباز خان سمیت کئی مشہور شخصیات نے شرکت کی۔ اس موقع پر ان کی اہلیہ شاشی گوسوامی کو زار و قطار روتے دیکھا گیا، جس کی ویڈیو نے سوشل میڈیا صارفین کو آبدیدہ کر دیا۔
