فرمان الہی
نماز کے اوقات
جمعیت علماء اسلام (جے یو آئی ف) کے سربراہ مولانا فضل الرحمان نےانکشاف کیا ہے کہ سیاسی اتحاد پاکستان ڈیموکریٹک موومنٹ (پی ڈی ایم) اب تک نہیں ٹوٹا ہے۔
تونسہ میں جلسہ عام سے خطاب میں فضل الرحمان نے کہا کہ پی ڈی ایم کا سربراہ اب تک میں ہی ہوں اور اپوزیشن میں ہوں جبکہ باقی پارٹیاں حکومت میں ہیں۔
انہوں نے کہا کہ پارلیمنٹ میں عوام کی نمائندگی ہم کررہے ہیں، ہم نے ایک فیصلہ بھی اپوزیشن جماعتوں سے مشورے کے بغیر نہیں کیا، ہماری تجویز تھی کہ آئینی عدالت قائم ہو، جو سیاسی کیسز کے فیصلے کرے۔
جے یو آئی سربراہ نے مزید کہا کہ 77 سالوں سے یہ بحث ختم نہیں ہورہی تھی کہ سود کو کیسے ختم کیا جائے، قوم کے اندر سیاسی شعور پیدا کرنے کی ضرورت ہے ،ہمارے الیکشن میں دھاندلی ہوتی ہے۔
ان کا کہنا تھا کہ امریکا انسانی حقوق کا قاتل اور اسرائیلی وزیراعظم جنگی جرائم کا مرتکب ہے،ہماری غربت کو ہماری کمزوری تصور کیا جا رہا ہے۔
فضل الرحمان نے یہ بھی کہا کہ ڈیڑھ سال میں فلسطین میں60 ہزار شہری بمباری سے شہید ہوئے،امریکا اور یورپ بھی اسرائیل کی حمایت کرنے پر برابر کے مجرم ہیں، جن کے ہاتھوں سے انسانیت کا خون ٹپک رہا ہے۔
انہوں نے کہا کہ غزہ میں بچے، جوان، بوڑھے موت کا انتظار کررہے ہیں، مسلمان حکمران اگر خاموش ہیں تو وہ بھی جبر میں شریک ہیں۔
جے یو آئی سربراہ نے کہا کہ ہماری پسماندگی کا غلط استعمال ہو رہا ہے، ہم جبر ظلم کےخلاف جنگ جاری رکھیں گے،انگریز کے وفادار ہمیں غلامی پر رضامند رکھنا چاہتے ہیں جبکہ ہمارا میدان غلامی سے بغاوت ہے۔
