فرمان الہی
نماز کے اوقات
وفاقی وزیرِ منصوبہ بندی احسن اقبال کا کہنا ہے کہ ہر شہری پوچھ رہا ہے کہ ہم نے کامیابی کا کتنا سفر کیا؟ پاکستان چوتھی اڑان بھرنے جا رہا ہے۔
لاہور میں سیمینار میں خطاب کرتے ہوئے انہوں نے کہا کہ جب پاکستان بنا تو بھارت نے ہمارے وسائل پر قبضہ کیا، 1960ء میں ایکسپورٹ 200 ملین ڈالرز تھی، آج 32 ارب ڈالرز پر پہنچے ہیں۔
احسن اقبال کا کہنا ہے کہ ہم رفتہ رفتہ ہر ملک سے پیچھے کیوں رہ گئے؟ ہمیں ہر حال میں معاشی استحکام کی طرف جانا ہوگا، اس ملک میں ہر خواب کی تعبیر مل سکتی ہے۔
انہوں نے کہا کہ ملک میں مارشل لاء نے ترقی کا سفر روک دیا، ہمارے وژن 2025ء پر لوگ ہنستے تھے، ہم نے کامیابیوں کو اپنے ہاتھ سے کلہاڑا مار کر برباد کر دیا۔
وفاقی وزیر کا کہنا ہے کہ سی پیک کو بھی چور بنا کر کٹہرے میں کھڑا کیا گیا، گزشتہ دورِ حکومت میں دوست ممالک کو ناراض کیا گیا۔
احسن اقبال نے کہا کہ اب پاکستان کے پاس معاشی غلطی کی گنجائش نہیں، 32 ارب ڈالر ایکسپورٹ 100 ارب ڈالر تک پہنچے گی تو ترقی ہوگی، ہماری جی ڈی پی بڑھنا ایکسپورٹ پر منحصر ہے۔
وفاقی وزیر کا کہنا ہے کہ ہر نوجوان کو ایک ایکسپورٹر بننے کی ضرورت ہے، ای کامرس نے دنیا بھر میں تہلکہ مچا دیا ہے، دنیا زرعی معیشت سے ٹیکنو اکانومی میں بدل گئی ہے۔
انہوں نے کہا کہ زراعت کے شعبوں سے منسلک ایک ہزار سائنسدان چین بھیج رہے ہیں، ہمیں ایک قومی اتفاق رائے کی ضرورت ہے، ملک میں نفرت اور انتہا پسندی کو ختم کرنے کی ضرورت ہے، اڑان پاکستان پروگرام سے نوجوانوں کے اندر نفرت کا خاتمہ کریں گے، مشکلات سے نکلنے کے لیے اجتماعی مثبت سوچ کی ضرورت ہے۔
