فرمان الہی
نماز کے اوقات
نیشنل سائبر کرائم انویسٹی گیشن ایجنسی نے ریاستی اداروں کے خلاف مہم جوئی پر کارروائی کر کے 5 ملزمان کے خلاف مقدمات درج کرلیے۔
ترجمان کے مطابق مقدمے میں عادل راجہ، معید پیرزادہ، محمد عمر، نذیر بٹ اور احمد نورانی ملزمان نامزد ہیں۔ یہ نامزد ملزمان سوشل میڈیا پر ریاستی اداروں کے خلاف گمراہ کن پراپیگنڈے میں ملوث ہیں۔
ملزمان پر حالیہ پاک بھارت کشیدگی کے دوران جھوٹا اور اشتعال انگیز مواد شیئر کرنے کا الزام ہے۔
مقدمے کے متن کے مطابق افواج پاکستان، ریاستی اداروں کے خلاف جھوٹا اور اشتعال انگیز مواد شیئر کیا گیا۔ ملزمان مسلسل سوشل میڈیا پر جھوٹے اور گمراہ کن مواد کی تشہیر میں ملوث رہے۔
مقدمے کے مطابق یہ مواد ریاستی اداروں، خصوصاً افواج پاکستان اور اعلیٰ حکام کے خلاف نفرت انگیزی کا باعث ہے۔ سوشل میڈیا پر پھیلایا گیا یہ مواد عوام میں خوف و ہراس پھیلانے کا بھی باعث ہے۔
ملزمان نے عوام میں انتشار، بےچینی، ریاست کے خلاف بداعتمادی پیدا کرنے کی کوشش کی۔
ترجمان کا کہنا ہے کہ این سی سی آئی اے نے ملزمان کے خلاف مقدمات درج کر کے قانونی کارروائی شروع کردی۔
