فرمان الہی
نماز کے اوقات
پنجاب کے مختلف شہروں میں آندھی اور طوفان کے باعث مختلف حادثات میں 10 افراد جاں بحق، 51 زخمی ہو گئے۔
اسلام آباد میں تیز آندھی کے ساتھ بارش ہوئی، اولے بھی گرے، آب پارہ میں پانی گھروں میں داخل ہو گیا۔
نالہ لئی میں پانی کی سطح بلند ہو گئی، بارشوں کے باعث راول پنڈی میں رین ایمرجنسی نافذ کر دی گئی۔
لاہور میں آندھی اور طوفان کے بعد بارش ہوئی، پورے شہر کی بجلی بند ہو گئی، کئی درخت جڑوں سے اکھڑ گئے، قذافی اسٹیڈیم کے کئی بوتھ اڑ گئے، سرچ لائٹس کے پول گر گئے۔
خراب موسمی صورتِ حال کے باعث لاہور قلندرز اور کوئٹہ گلیڈی ایٹرز کی پریکٹس منسوخ کر دی گئی۔
چکوال میں طوفانی بارش کے باعث کلر کہار کے قریب موٹر وے ایم ٹو کو کئی گھنٹوں کے لیے بند کرنا پڑ گیا۔
ملتان، حافظ آباد، گوجرانوالہ، اٹک اور سیالکوٹ میں بھی آندھی چلی، جس سے دن میں رات کا منظر ہو گیا، مختلف شہروں میں متعدد مقامات پر سولر پینل اڑ گئے۔
پروونشل ڈیزاسٹر مینجمنٹ کے ترجمان نے بتایا ہے کہ اموات بوسیدہ مکانات کے گرنے اور لوگوں کے غیر محفوظ مقامات پر ہونے کے باعث ہوئی ہیں۔
ترجمان پی ڈی ایم اے کے مطابق لاہور میں درختوں کے گرنے اور سولر پینلز کو نقصان کے واقعات بھی رپورٹ ہوئے ہیں۔
ڈی جی پی ڈی ایم اے کا کہنا ہے کہ حکومتِ پنجاب کی پالیسی کے مطابق متاثرہ خاندانوں کو مالی معاونت فراہم کی جائے گی۔
پشاور میں مٹی کا طوفان آیا، مالا کنڈ، ایبٹ آباد، مردان، چارسدہ اور مانسہرہ سمیت مختلف شہروں میں بارش ہوئی۔
سوات میں پانی مکانوں اور دکانوں میں داخل ہو گیا، ژالہ باری سے فصلوں اور باغات کو نقصان پہنچا۔
وادیٔ نیلم اور مظفر آباد سمیت آزاد کشمیر کے مختلف علاقوں میں بھی بارش ہوئی، سیلابی پانی کے باعث باڑیاں سیری کے مقام پر شاہراہِ نیلم بند ہو گئی۔
