فرمان الہی
نماز کے اوقات
بےنظیر ہنرمند پروگرام کا اجراء کر دیا گیا، ایوانِ صدر اسلام آباد میں منعقدہ تقریبِ اجراء سے صدرِ مملکت آصف علی زرداری نے خطاب کیا۔
انہوں نے کہا کہ بی آئی ایس پی کے اجراء میں نوید قمر کی کاوشیں قابلِ ستائش ہیں، اس پروگرام کے تحت بچوں کو تعلیم سمیت تمام حقوق فراہم کیے جا رہے ہیں۔
صدر زرداری نے کہا کہ بےنظیر ہنرمند پروگرام کے ذریعے بچوں اور بچیوں کو ہنر مند بنایا جائے گا، پروگرام کے تحت کمپیوٹر، جدید تعلیم اور ہنر سکھائے جائیں گے۔
ان کا کہنا ہے کہ ہنر سیکھ کر نوجوان دیارِ غیر میں ملک کا نام روشن کریں گے، نرسنگ جیسے شعبے کی بیرونِ ملک میں بڑی مانگ ہے، بچیوں کو نرسنگ کے شعبے میں تربیت فراہم کی جائے گی۔
صدر آصف علی زرداری نے کہا کہ ہنر مند پروگرام میں جرمن اور چینی زبان بھی سکھائی جائے گی، پیپلز پارٹی عام لوگوں کو با اختیار بنانا چاہتی ہے۔
ان کا یہ بھی کہنا ہے کہ نوجوان ہنر سیکھ کر اپنے خاندان کی کفالت اور قوم کی خدمت کر سکتے ہیں، ہم جدید ٹیکنالوجی لوگوں تک منتقل کرنا چاہتے ہیں۔
