فرمان الہی
نماز کے اوقات
کراچی میں نامعلوم سمت سے آنے والی گولی لگنے سے 13 سالہ نوعمر لڑکی جاں بحق ہو گئی، مرنے والی لڑکی کرسٹینا چوتھی جماعت کی طالبہ تھی۔
ورثاء کے مطابق 13 سالہ کرسٹینا گھر کے صحن سے کمرے میں جا رہی تھی کہ اچانک گر گئی، اسے فوری طور پر اسپتال لے گئے جہاں ایکسرے کے بعد معلوم ہوا کہ کرسٹینا کو گولی لگی ہے، واقعہ ہفتہ کو پیش آیا تھا جبکہ کرسٹینا اتوار کو دورانِ علاج جناح اسپتال میں دم توڑ گئی۔
کرسٹینا کے والد راشد نے بتایا کہ کرسٹینا پانچ بہن بھائیوں میں تیسرے نمبر پر تھی اور چوتھی جماعت میں زیرِ تعلیم تھی، انہوں نے حکومت سے مطالبہ کیا کہ ہوائی فائرنگ پر پابندی کے حکم پر سختی سے عمل درآمد کروایا جائے تاکہ آئندہ اس طرح کوئی قیمتی جان ضائع نہ ہو۔
اس سلسلے میں پولیس حکام کا کہنا ہے ابتدائی طور پر بچی کو گھر میں چوٹ لگنے کی اطلاع ملی تھی فائرنگ کی تصدیق کے بعد پولیس نے تحقیقات کا آغاز کر دیا ہے۔
