فرمان الہی
نماز کے اوقات
وفاقی وزیرِ منصوبہ بندی احسن اقبال نے کہا ہے کہ جس نے کبھی یونین کونسل نہیں چلائی، ملک کی چابیاں اس کے حوالے کر دی گئیں، انہوں نے 4 سال میں نفرت، گالم گلوچ اور مخالفین پر جھوٹے مقدمے بنانے کے سوا ملک کو کچھ نہیں دیا۔
نارووال میں تقریب سے خطاب کرتے ہوئے احسن اقبال نے کہا کہ بزدار حکومت نے پنجاب کو تباہ کر کے رکھ دیا، جو پنجاب دنیا میں ترقی کی علامت تھا اس کو اندھیروں میں دھکیل دیا گیا۔
انہوں نے کہا کہ آج شہباز شریف کی قیادت میں میں پاکستان پھر سے اڑان بھر رہا ہے، مسلم لیگ ن ہی ملک کی ترقی کی ضمانت ہے، آج ملک کو اتحاد اور یک جہتی کی ضرورت ہے۔
احسن اقبال نے کہا کہ 10 مئی کو بھارت کو عبرت ناک شکست ہوئی جو اس نے اپنی تاریخ میں نہیں دیکھی، پی ٹی آئی کا سوشل میڈیا ریاست، مسلح افواج اور سپہ سالار کے خلاف زہر اگل رہا ہے۔
انہوں نے کہا کہ اس فتح کے بعد اگر کسی کو رونا چاہیے تو وہ تو بھارت ہے، آج بھارت کو پوری دنیا میں رسوائی کا سامنا ہے، جو پاکستان کی فتح پر بھارت کا بیانیہ بولے کیا وہ ملک کا وفادار ہے یا بھارت کا؟
احسن اقبال نے کہا کہ پی ٹی آئی کے گھناؤنے عزائم عوام کے سامنے آ چکے ہیں، اللّٰہ کی مدد کے بعد ایک مضبوط فوج ہی اس ملک کی حفاظت کی ضمانت ہے، کل دہشت گردوں کا مقابلہ کرتے ہوئے ہمارے 13 بہادر جوان شہید ہوئے، ہمارے جوان ملک کی حفاظت کے لیے جانوں کے نذرانے پیش کر رہے ہیں۔
انہوں نے یہ بھی کہا کہ ایک جماعت ہمارے شہداء اور مسلح افواج کے خلاف ہرزہ سرائی کر رہی ہے، یاد رکھنا، ہماری فوج مضبوط ہے تو ملک مضبوط ہے، ملک مضبوط ہے تو ہم مضبوط ہیں۔
