فرمان الہی
نماز کے اوقات
پاکستانی اداکارہ حمیرا اصغر کے اسٹائلسٹ دانش مقصود اداکارہ کی موت کو کیش کرنے والوں پر برس پڑے۔
مختلف سوشل میڈیا پلیٹ فارمز پر دانش مقصود کے مختلف ویڈیو کلپس وائرل ہو رہے ہیں جس میں انہوں نے دکھاوا کرنے والے شوبز انڈسٹری کے فنکاروں کو آڑے ہاتھوں لے لیا۔
انہوں نے فنکاروں کو تنقید کا نشانہ بناتے ہوئے کہا کہ حمیرا اتنے عرصے سے لاپتہ تھیں ان کے ساتھ کام کرنے والے بالخصوص حال ہی میں ریلیز ہونے والی فلم ’لوو گرو‘ کی کاسٹ اور ریئلٹی شو تماشا گھر کے میزبان اور ان کے ساتھیوں کو حمیرا کی گمشدگی کا علم نہیں ہوا۔
انہوں نے سوال اُٹھاتے ہوئے کہا کہ میں تو حمیرا کے ساتھ کام نہیں کرتا تھا، لیکن جو ان کے ساتھ کام کرتے تھے کیا ان میں سے کسی کو بھی ان کی کمی محسوس نہیں ہوئی؟
دانش مقصود نے حمیرا کی لاش اُٹھانے والوں پر بھی تنقید کی اور کہا کہ میں شروع سے کہہ رہا ہوں کہ حمیرا کی موت 1 ماہ قبل نہیں کئی ماہ قبل ہوئی لیکن جنہوں نے لاش اُٹھائی ان کا روز کا کام ہے اکثر وہ لوگ کئی ماہ اور ایک سے زائد برس پرانی لاش بھی اُٹھاتے ہیں، کیا انہیں حمیرا کی لاش دیکھ کر اندازہ نہیں ہوا کہ لاش کتنی پرانی ہوسکتی ہے۔
اسٹائلسٹ نے یہ بھی کہا کہ جب یہ معاملہ توجہ کا مرکز بن گیا تو اداکارہ سونیا، یاسر حسین، یشمٰی گِل آگئیں کہ ہم ان کی تدفین کے لیے تیار ہیں تاکہ شہرت حاصل کرسکیں یہ لوگ اس سے پہلے کہاں تھے؟
انہوں نے اداکارہ رابعہ کلثوم کی تعریف کی اور کہا کہ صرف رابعہ کلثوم تھیں جنہوں نے فروری میں مجھ سے اس وقت رابطہ کیا جب میں نے پہلی بار پوسٹ شیئر کی۔
خیال رہے کہ اداکارہ حمیرا اصغر کی لاش 8 جولائی کو کراچی کے علاقے ڈیفنس فیز 8 کے ایک فلیٹ سے ملی تھی، جہاں وہ کرائے پر رہائش پذیر تھیں۔
ان کی تدفین 11 جولائی کو آبائی شہر لاہور میں کی گئی تھی۔
پولیس اور پوسٹ مارٹم رپورٹ کے مطابق اداکارہ کی لاش کم سے کم 9 ماہ پرانی تھی، ممکنہ طور پر ان کی موت 7 اکتوبر 2024 کو ہوئی تھی۔
