فرمان الہی
نماز کے اوقات
ایک جانب جہاں ورلڈ چیمپئن شپ آف لیجنڈز 2025ء کے سیمی فائنل میں انڈیا چیمپئنز کے پاکستان کے خلاف نہ کھیلنے پر تنازع جاری ہے، وہیں پاکستان کے سابق کرکٹر کامران اکمل کا ایک خوبصورت عمل سوشل میڈیا پر دل جیت رہا ہے۔
وائرل ویڈیو میں دیکھا جا سکتا ہے کہ ایک نوجوان بھارتی مداح کامران اکمل سے ان کے دستانے مانگتا ہے، کامران اکمل مسکراتے ہوئے اپنے کِٹ بیگ کے پاس جاتے ہیں، دستانے نکالتے ہیں اور مداح کو دے دیتے ہیں۔
ویڈیو میں مداح سے جب پوچھا جاتا ہے کہ وہ کیسا محسوس کر رہا ہے، تو وہ خوشی سے جواب دیتا ہے کہ میں بہت خوش ہوں، میں کامران اکمل کا بہت بڑا فین ہوں۔
یہ ویڈیو سوشل میڈیا پر زبردست پذیرائی حاصل کر رہی ہے، ایک صارف نے لکھا کہ بھارت پاکستان سے میچ کھیلنے سے انکار کر رہا ہے اور ادھر ان کے مداح پاکستانی کھلاڑیوں سے دستانے مانگ رہے ہیں، ایک اور صارف نے تبصرہ کیا کہ کامران اکمل نے دل جیت لیے۔
یاد رہے کہ پاکستان چیمپئنز سیمی فائنل کھیلے بغیر ہی فائنل میں پہنچ گئے کیونکہ بھارت نے سیاسی تناؤ کے باعث میچ کھیلنے سے انکار کر دیا، اس سے پہلے بھی انڈیا گروپ اسٹیج میں پاکستان کے خلاف میچ سے دستبردار ہوا تھا۔
اب سب کی نظریں ہفتے کو ہونے والے فائنل پر ہیں، جہاں پاکستان چیمپئنز اپنا ٹائٹل دفاع کریں گے۔
